– Dihtomielalaččat vállje badjelgeahččat konsultašuvdnašiehtadusa

– Dát lei hui lossat skuvlla ohppiide ja bargiide, ja maiddái lullisámi guvlui gos lea leat galle sámi ásahusa oidnosis. Mu mielas dát lea maid čielga ovdamearkan dasa mo máhttoministtar Torbjørn Røe Isaksen dihtomielalaččat vállje badjelgeahččat konsultašuvdnašiehtadusa gaskal stáhta eiseválddiid ja Sámedikki, dadjá sámediggeráđđi Silje Karine Muotka.

– Mu oainnu mielde dát ášši lea mielde doadjimin luohttámuša gaskal Sámedikki sámi álbmoga álbmotválljen orgána ja Máhttodepartemeantta. Konsultašuvdnašiehtadus lea gaskaoapmi dasa ahte gávdnat čovdosiid buriin dáhtuin gaskal Sámedikki sámi álbmoga ovddasteaddji orgánan ja stáhta, in ge mu ádde manne dát gaskaoapmi ii geavahuvvon dán áššis. Dát lea konsultašuvdnašiehtadusa čielga rihkkun, dadjá Muotka.

Dál gáibida Sámediggi ahte skuvlla oahppit ja oapmahaččat ožžot čielga dieđu das makkár oahppofálaldaga sii ožžot ovddasguvlui.

– Ohppiin lea vuoigatvuohta oažžut oahpaheami lullisámegielas oahpahuslága vuođul. Sii ánssášit oažžut čielga dieđu das ahte nu galgá jotkojuvvot, ja dieđu ođđa fálaldaga birra. Sámediggi vuordá ahte oahpahusfálaldagas lea seamma kvalitehta go dál ja ahte galget leat seamma ollu giellačoahkkaneamit go dálá fálaldagas, dadjá Muotka

– Dát ášši han ferte leat leamaš digaštallojuvvon Máhttodepartemeanttas dán jagi njukčamánu bušeahttakonferánssa rájes, nu ahte ii ávkkut dadjat ahte eai leat plánat boahtteáiggi várás, loahpaha Muotka.

Dat filbma ievttá miellačájeheamis lei viidát juhkojovvon sosiála mediain, muhto datte ge ii lea veahkehan rievdadit eisseválddiid oainnuset áššis.