Ikte doalai iežas maŋimuš dievasčoahkkima Suoma beale Sámediggi. Bargoortnet ja digitála sátnegirji nuortalašgillii ledje guovddáš áššit.
Suoma beale sámedikki dán jagáš maŋimuš dievasčoahkkimis eanemus ságastahtii áššin lei sámedikki ođđa bargoortnet, deattuha Yle Sápmi.
– Bargoortnet ođastusa gieđahallan bistii guhka, go das leat oktiibuot 89 paragráfa. Dat lea maiddái dehálaš áššegirji, go dat stivre Sámedikki buot doaimmaid, maid eai lágain leat mearridan, čilge Suoma beale Sámediggepresideanta Tiina Sanila-Aikio Ávvirii.
Ođđa bargoortnegis kulturmearreruđaid ohcan rievdá, boahtteáiggis dušše kulturlávdegotti lahtut eai sáhte ohcat kulturdoarjagiid. Ođđa bargoortnet boahtá fápmui jagi 2016 álggus.
Dievasčoahkkimis dahkkojuvvui maiddái earret eará evttohus, ahte bargoortnegii ásahuvvošii vejolašvuohta válljet stivrralahtuide várrelahtuid, muhto evttohus dáhpii jienastusas dálá vuogádahkii
Digitála sátnegirji nuortalašgillii
Sámedikki dievasčoahkkin dohkkehii čoahkkimis maid boahtte jagi bušeahta ja doaibmaplána.
Doaibmaplána sisttisdoalai evttohusa nuortalašgielat digitálasátnegirjji. Doaibmaplána dohkkeheami oktavuođas lei guhkes ságastallan sámegielaid sátnegirjedilis, muhtin áirasiin lei hállu ráhkadit digitála sátnegirjji juohke sámegillii, čállá Yle Sápmi.
– Bargu lea juo álgán ja dat joatkašuvvá boahtte jagi, muitala Sanila-Aikio Ávvirii.
– Digitála sátnegirji nuortalašgillii lea dehálaš nuortalašgielagiidda, nuortalašgiela ohppiide, dutkiide ja eará sámegielagiidda, čilge Suoma beale Sámediggepresideanta.
Muhto boađus ságastallamis šattai dat, ahte sámedikkis lea heajos ruhtadilli ja ahte lea divrras buvttadit digitála sátnegirjjiid juohke golmma sámegilli.
Earret eará dievasčoahkkin válljii sámedikki hálddahushoavdan Pia Ruotsala.
