Sus ledje filmmat 85 diimmu ovddas mat čájehit vuolleahkásaččaid geat vásihit seksuálalaš rohcošemiid. Dál lea Sis-Finnmárkku diggegoddi cealkán duomu áššis.
Golggotmánus 2018:s ja dan ovdal ledje sus oktiibuot čoggon 14 400 gova ja 442 filmma main čájehit mánáid geat vásihit seksuála rohcošeami dahje mánáid seksuála vuogi mielde ovdanbuktit, maid ollislaččat dahje belohahkii sáhttet earát viežžat su ip-čujuhusas Bitorrentain, čuožžu čállon Sis-Finnmárkku diggegotti duomus.
Badjel čieža jagi
Dievdu mieđihii iežas belohahkii sivalažžan áššáskuhttimii.
Áššis ledje golbma vihttana, ja nu go riektegirjjis bođii ovdan, de ovdanbukte duođaštusaid maid.
Dievddus ledje filmmat mat oktiibuot bistet 85 diimmu, ja dihtoroassi lei badjelaš 55 GB.
Dutkamiid bokte leat gávnnahan ahte doaimmat leat čađahuvvon njukčamánu 15. beaivvi 2011:s gitta golggotmánu 1.beaivvi 2018 rádjái.
Sisdoaluin leat eanemusat gaskal 7- ja 14-jahkásaš nieiddažat, muhto soames sisdoaluin leat mánát geat leat 2- ja 3-jahkásaččat ja das boarráseappot.
Áššáskuhtton
Áššáskuhttimis maid Romssa ja Finnmárkku stáhtaadvokáhtat gárvejedje njukčamánu 17. beaivvi 2019:s, de lea dievdu áššáskuhtton Sis-Finnmárkku diggegottis go lea rihkkon Ráŋggáštuslága paragráfa 311, go lea viidáset almmuhan ovdanbuktimiid main leat seksuála rohcošeamit mánáid vuostá dahje ovdanbuktimat main leat seksualiserejuvvon mánát mielde.
Boahtá maid ovdan ahte lea áššáskuhtton go lea maid viežžan dahje vurkkodan ovdanbuktimiid main leat seksuála rohcošeamit mánáid vuostá dahje mánát geat leat ovddiduvvon seksuálalaččat, dahje dáhtolaččat háhkan alcces dakkár materiálaid.
Go daddjo mánná, de oaivvilduvvo olmmoš gii lea vuollel 18 jagi boaris.
Beasai áššegoluin
Borgemánu 13. beaivvi lei diggi dievddu vuostá, mas Sis-Finnmárkku diggegoddi dubmii dievddu giddagassii jahkái ja guovtti mánnui.
Dan sivas go dievdu mieđihii sivalašvuođa, de oaivvilda diggegoddi ahte eai dubme dievddu máksit áššegoluid, ja duopmu lei ovttajienaš.
