* Golggotmánu 11. beaivvi 2021 celkkii Norgga Alimusriekti ahte konsešuvnnat mat addojuvvojedje guovtti bieggafápmorusttega huksema oktavuođas Fosenis, Roanis ja Storheias, rihkkot Fosena boazosápmelaččaid minoritehtasuodjaleami. Danne eai leat konsešuvnnat gustovaččat.
* Dán jagi guovvamánu 23. beaivvi, go ledje gollan 500 beaivvi dan rájes go Alimusriekti celkkii duomu, serve Norgga Sámiid Riikkasearvvi ja Natur og Ungdom aktivisttat miellačájeheapmái ja okkuperejedje Oljo- ja energiijadepartemeantta ja máŋga eará departemeantta vuostáiváldinbáikki.
* Go miellačájeheamit ledje bistán njeallje beaivvi, de šállošeigga stáhtaministtar Jonas Gahr Støre ja oljo- ja energiijaministtar Terje Aasland olmmošvuoigatvuođaid rihkkumiid Fosenis ja lohpideigga ahte proseassa ovdána jođánit.
* 100 beaivvi maŋŋil, geassemánu 2. ja 3. beaivvi dán jagi, ledje ođđa miellačájeheamit. Akšunisttat gáibidedje ahte ášši ovdána johtileappot. Sii giddejedje beassama Stáhtaministara kantuvrii , demonstrerejedje Šloahta olggobealde ja Stuoradikki olggobealde.
* Geassemánu 26. beaivvi álggahuvvui ođđa akšuvdna Roan bieggapárkkas Fosenis. Motvind Norge akšunisttat ja Luonddugáhttenlihttu bissehedje bieggafápmorusttega geainnuid.
* Ođđa akšuvnnat leat dieđihuvvon 11.10.23. De leat gollan guokte jagi dan rájes go Alimusriekti celkkii duomu.
* Dat guokte bieggafápmorusttega ledje gárvásat jagiid 2018 ja 2019. Lea máksán birrasii 6 miljárdda ruvnno cegget oktiibuot 151 bieggaturbiinna.
* Storheia ja Roan bieggafápmorusttegat leat Fosen orohaga siskkobealde, ja daid viidodat lea oktiibuot sullii 4200 njealjádaskilomehtera. Dat guokte elfápmorusttega váldet oktiibuot sullii 175 njealjádaskilomehtera. Turbiinnat leat biddjon várrevilttiide ja guovlluide mat lea dehálaš giđđadálveguođohanguovllut.
* Alimusrievtti oaivila mielde dagaha huksen guhkit áiggi vuollái ahte guohtunvejolašvuođat manahuvvojit dan mađe ahte ii sáhte buhtadit ollásit jus sirddáše eará guohtunguovlluide. (©NTB)
