Eanandoallodirektoráhtta lea nammadan bargojoavkku mii galgá bargat boazodoalu siskkáldas dárkkisteami ja iešstivrejumi ovdánahttimiin. Bargojoavkkus lea vuosttaš čoahkkin ihttin, golggotmánu 21. beaivvi.
Eanandoallodirektoráhtta lea nammadan bargojoavkku mii galgá bargat boazodoalu siskkáldas dárkkisteami ja iešstivrejumi ovdánahttimiin. Bargojoavkkus lea vuosttaš čoahkkin ihttin, golggotmánu 21. beaivvi.
Bargojoavkkus, mii galgá čoahkkinastit vuosttaš háve jo ihttin gaskavahku, leat mielde áirasat geat ovddastit Norgga Boazosápmelaččaid Riikkasearvvi (NBR), Sámedikki, fylkkamánniid ja Eanandoallodirektoráhta.
Bargojoavkku galgá jođihit Eanandoallodirektoráhta fágadirektera Ola Christian Rygh.
– Dehálaš gávdnat čovdosiid
Ávvir lea váldán oktavuođa Norgga Boazosápmelaččaid Riikkasearvvi bargojoavkku ovddasteddjiin Johán Dániel Gaupiin gullan dihte makkár vuordámušat leat NBR bealis bargojoavkku barggu ektui.
– Dát lea vuosttáš háve go mii deaivvadit bargojoavkun. Jáhkán vuos galgat beassat johtui dainna bargguin. Buktit ovdan jurdagiid barggu ektui, čilge Juhán Dánel Gaup.
– Mii soaitit čoahkkinastit juohke mánu go dása lea stuorra dárbu. Go mii gávdnat čovdosiid, buoridit boazodolliid beaivválaš dili geat leat boazodoalus beaivválaččat. Nu goit mii NBR bealis oaidnit dan bargojoavkku bargun, čilge Gaup Ávvirii.
Bargojoavkku duogáš
Boazodoalloláhka, mii doaibmagođii 2007:s, galgá addit vuođu vuogas sisskáldas organiseremii ja boazodoalu hálddašeapmái. Lága mielde galgá boazodoallu ieš siskkáldas iešstivrejumiin váldit aktiivvalaš rolla ja ovddasvástádusa vai boazodoallu lea ekologalaččat, ekonomalaččat ja kultuvrralaččat ceavzil. Boazodoalloláhka lea dál doaibman gávcci jagi. Dan áiggis lea láhka álggahuvvon ja doaimmahuvvon. Dan áiggis lea maid hálddašeapmi rievdan go guovllustivrrat leat heaittihuvvon. Sihke eiseválddiin ja geavaheddjiin leat vásáhusat boazodoallolága njuolggadusaiguin mat gusket iešstivrejupmái.
Boazodoalloláhka addá iešstivrejumi olis ealáhussii ovddasvástádusa čađahit deaŧalaš osiid lágas. Siidaosiin, siiddain ja orohatstivrrain leat iešguđetlágan rollat maid galget deavdit vai ealáhusa iešsstivren doaibmá buoremusat.
Boazodoallošiehtadallit mearridedje boazodoallošiehtadussii 2015/16 álggahit bargojoavkku mii galgá ovdánahttit siskkáldas dárkkisteami ja iešstivrema boazodoalus. Bargu lea čilgejuvvon Prop. 68 S 2014-2015 Reindriftsavtalen 2015/2016, oktan 2015 stádabušeahta rievdademiiguin. Doppe boahtá ovdan ahte boazodoalus leat boahtteáiggis stuora hástalusat ja danin šaddá báikkálaš stivren deaŧalažžan vai olaha boazodoallopolitihkálaš mihtuid.
Bargun lea earret eará čađahit guokte seminára, nubbi lea pilotprošeakta mas galget ovdánahttet siskkáldas dárkkisteami ja iešstivrema, ja nubbi pilohtaprošeakta mas galget ovdánahttet soabadallama.
