Marion Ravna lohká ahte sápmelaččat fertejit leahkit mielde veagalváldimiid digaštallamis Norggas ja čájehit ahte eai sámit ge dohkket dan ja sii maiddái dáhttot lágaid rievdat.
Marion Ravna lohká ahte sápmelaččat fertejit leahkit mielde veagalváldimiid digaštallamis Norggas ja čájehit ahte eai sámit ge dohkket dan ja sii maiddái dáhttot lágaid rievdat.
Odne diibmu 17:00 áigu «Kvinnefronten» doallat miellačájeheami Stortorgetis Romssas maŋŋel go Borgarting lágamanneriekti áššehuhtii golbma dievddu geat ledje áššáskuhtton go galget leat veagalváldán ovtta nuorra nieidda guhte lea eret Lærdalas.
Miellačájeheamit leat riikaviidosaččat ja lágiduvvojit maiddái earret eará Oslos, Bergenis,Troandimis ja Stavangeris.
Ferte leahkit mielde
Marion Ravna, gii maiddái lea Norgga Sámiid Riikkasearvvi ráđđeaddi Sámedikkis, lea oassálastime miellačájeheamis, ja son lohká ahte sápmelaččat fertejit leat mielde sihke miellačájeheamis ja digaštallamis mii čuovvu.
– Mun lean mielde go lean dolkan ahte Norggas galgá leat vejolaš illastit nuppiid, ja das eai leat váikkuhusat.
Sámis vel vearrát
Ravna lohká lea dehálaš sápmelaččaide čájehit ahte eai dohkket nu galgá leat, ja go leat gullan seksualálaš illastanáššiid sápmelaččaid birra maŋemus áiggiid.
– Mun lean gullan ahte sámi servvodagas lea vel vearrát dilli go muđui riikkas. Lean gullan Norggas leat dušše 10 proseantta geat váidet veagalváldimiid, na ahte sáhttá dušše jurddašit movt dilli lea sámiid gaskkas. Danne oainnán mun hui dehálažžan ahte sámit maiddái leat mielde dán digaštallamis mii dál lea Norggas, lohká Ravna.
Riektesihkarvuohta áitojuvvon
Miellačájehemiid vuolggaheaddji Romssas lea «Kvinnefronten» miellahttu Elin Gjikaj, ja son muitala ulbmil dainna lea bidjat fokusa dasa ahte nissoniid riektesihkarvuohta Norgga diggestobuin lea áitojuvvon ja lea servvodatváttisvuohta.
– Dat ášši lea boktán stuora beroštumi álbmogis, ja ášši roavisvuođa dihte lea olbmuid mielas vuoiggameahttun ja nu leage šaddan symbolaáššin, lohká Gjikaj.
(Ášši joatká gova vuolabealde)
Manne friddja
Borgarting diggeáššis ledje jurys čieža duopmára. Golbma fágaduopmára ja njeallje álbmogis duopmára, mii lea oktasaš doaba mielduopmárii ja jurylahttui.
Buot fágaduopmárat ja okta álbmogis duopmár áigo dubmet dievdduid, ja golmmas ges áššuhuhttit sin.
Go ii lean doarvái eanetlohku, de besse dievddut friddja, sii dattege dubmehalle máksit buhtadusa niidii.
Gelbbolašvuođa loktet
Gjikaj lohká sii dáhttot oažžut láhkarievdadusa go álbmogis duopmáriin, geat leat dábálaš olbmot, ii leat gelbbolašvuohta meannudit dákkár roavva veagalváldináššiid.
– Mii dáhttut digaštallama ortnega birra, ja gealboloktema álbmogis duopmáriin. Mii dáhttut rievdadusa ja háliidit loktet digaštallama alit politihkalaš dássái, ja seammás dárbbašit mii guottuid nuppástuhttima servvodagas ahte ii leat nissoniid sivva go sii veagalváldojuvvojit, lohká son.
Čalmmustahttet ášši
Gjikaj, geas alddis lea duogáš Guovdageainnus, lea ovttaoaivilis Ravnain ahte sámiid gaskkas lea maid dehálaš čalmmustahttit váttisvuođa.
– Go leat gullan seksualálaš illastemiid birra sápmelaččaid gaskkas, de lea dehálaš sámiide maid searvat digaštallamiidda, lohká son.
