Sirma IL joavkku Henrik Arntzen Joks, gii lea olles gilvvu nuoramus, leaba iežas áhččin Stein Joksan goalmmádin of300 gilvvus ja leaba duolmmastan diibmu 08:36 viidáset Mázes Jotkii.
Iđitdiimmuin leat gilvaleaddjit joavdan Šuoššjávrái ja duolmmastan viidáset Mázii, man meattá leat dál leat ovcci joavkku duolbman. Idja vánddardeapmi lea mannan njozet, muhto muhtin joavkkut leat čielgasit falit go earát ja hálddašit bures hástalusaid.
Buori vuoimmis
– Soai leaba buori vuoimmis, váikko leaba duolbman badjel 230 kilomehtera. Mis lea olmmoš mannan sihkkelin ovddal sudno Jotkkai doalvut borramuša, gosa eat beasa biillain. Mihttomearri sudnos lea doalahit goalmmát saji, jus eai fal bárttit geava. Muhto mátki lea ain guhki ja mii fertet oaidnit mo manná, muitala Marianne Balto Ávvirii maŋŋel go Team Joks lei jođus Jotkkai.
Balto lea okta Sirma IL vehkkiiguin čuovvumin ja veahkkeheamen sin joavkku.
Šaddan guoddit sihkkela
– Mađiija leamaš hui lossat ja šaddá vel losit loahpageažis ja gilvaleaddjit rahččet. Mađiija lea nu lossat gaskkohagaid ahte gilvaleaddjit šaddet guoddit sihkkela. Muhtimat leat šaddan maiddái gaskkalduhttit iešguđet sivaid geažil. Muhtimiin leat billašuvvan sihkkelat dahje juvllat ja muhtimat leat vuorjašuvvan bákčasiin. Muhto eai leat eambo joavkkut gaskkalduhttán go maid leimmet vuordán, dadjá gilvvuid jođiheaddji Jørund Greibrokk.
Deanu ruovddit
Goalmmádin leaba Sirma IL joavku Team Joks, Henrik Arntzen Joks ja su áhčči Stein Joks, measta beannot diimmu maŋábealde njunnoša Team Subaru, geat leaba garra jiellahat.
– Lea mearkkašahtti ahte gánda lea dušše 17 jahkásaš ja nie mielahis sávri. Dat lea issoras somá ahte soai leaba nie bures boahtán johtui gilvvus. Joks bearrašis leat eahpitkeahttá buorit genat, čaimmiha Greibrokk.
Rámida deatnulaččaid
Greibrokk rámida Team Joks, geat leaba duolbman jođánit, vaikko leamaš heajos siivu.
– Stein lea vuoitán oktii árat dán gilvvu ja diehtá mii dárbbašuvvo ja maid sisdoallá. Son lea maiddái leamaš guhkes tuvrrain iežas gánddain ja leaba bures ráhkkanan. Mun jáhkkan sudno nagodit doalahit goalmmát saji gitta mollii, beare oažžuba juhkosa ja biepmu gorudii, dadjá son.
Vuosttaš gilvaleddjiid sihke of700 ja of300 gilvvus vurdojuvvojit mollii Áltái gaskabeaivvi áigge.
