Ávvir lágida sátnejođiheaddjetriealla Guovdageainnus. Dálá stivrejeaddjit deaivvadit hástaleddjiiguin.
Maŋemus njeallje jagi lea Dáloniid listtus leamašan sátnejođiheaddji Guovdageainnus. Listtus lea ođđa sátnejođiheaddjeevttohas, namalassii son gii Guovdageainnus lea guhkimus leamaš sátnejođiheaddjin, Klemet Erland Hætta.
Hætta maŋŋel bođii ođđa, nuorra almmái ja válljejuvvui sátnejođiheaddjin. Johan Vasara ii lean sátnejođiheaddji go ovtta áigodaga ovdal go fárrii Tromsii studeret. Maŋemus áiggi ovdal go fárri ruoktot, barggai Johtolatdepartemeantta stáhtačállin guokte jagi. Dál lea Vasara fas ruovttoluotta Guovdageainnus ja hástala dálá stivrejeddjiid.
Johttisápmelaččaid listu lea dál nubbin stuorámus listu Guovdageainnus ja ollu áigodagaid sii leat leamaš stuorimusat. Dál lea listtu njunnošis, Anders S. Buljos, čielga áigumuš fas šaddat stuorámus joavkun suohkanstivrras.
Ávvir geahččalii oažžut seammalágan debáhta johtui Kárášjogas maid, muhto dađi bahábut ii heiven sátnejođiheaddjái, Bargiidbellodaga Svein Atle Sombyi, searvat debáhttii ovdal válggaid.
Geahča válgasáddaga avvir.no:s odne, duorastaga diibmu 19.00.
