Dán jagáš heargegilvvuid «Karasprint» gelddolaš loahppagilvvus vuittii Ellen Ingrid Eira heargi «Ingrid Luostat» dušše njunnegežiin ovttas Kárášjohkalaš Nils Kai Ante Antin.
Dán jagáš heargegilvvuid «Karasprint» gelddolaš loahppagilvvus vuittii Ellen Ingrid Eira heargi «Ingrid Luostat» dušše njunnegežiin ovttas Kárášjohkalaš Nils Kai Ante Antin.
Karasprint 2016 loahppagilvvuin deaivvadedje Ingrid Luostat, Suiva, Badboy ja Poveri. Oassegilvvut ledje dássádat, iige lean daddjon ovdal loahppagilvvu gii lea vuoiti, iige lean maiddái oktage dáid herggiin nu čielga jiellat.
Ingrid Luostat goittot vuittii, nubbin bođii Suiva, goalmmádin Badboy ja njealljádin bođii Poveri.
Buoremusat deaivvadedje
Ingrid Luostat ovttas Nils Kai Ante Antin ja Suiva ovttas Asllat Heandarat Antin leigga goittot čađat njunnošis ja dáistaleigga vuoittus.
Maŋŋel go hearggit jávkkehedje badjel moallasárgá, de návdojuvvui diimmá Karasprint vuoiti Suiva vuoitán, muhto go duopmárat gehčče moallakameras, de čurvo Ingrid Luostat ja Nils Kai Ante Anti vuoitin.
– Diimmá vuoiti lei mielde finálas ja dán jagáš Norggameašttir. Ledje dat falimus hearggit geat gilvaledje, muhto mun vudjen dan buot falimusa dán háve, dadjá duhtavaš Nils Kai Ante Anti.
Deaddilii njuni vulos
Vuoitoáiggis oaidná ahte Ingrid Luostat ii vuoitán nu ollu Suiva badjel ja dáiddiige leat dušše millimehteriid alde ahte faskii 15 000 ruvdnosaš vuoittu.
– Gullen olbmuin ahte ovdalaš dan busse, de lei mu heargi maŋábealde, muhto lea justa ovdalaš loahppa deaddilan njuni vulos moalasárga badjel ja lei doarvái ahte vuittii, čilge vuoitovuoddji.
Ingrid Luostat galgá fas gilvvohallat beassášlávvardaga Guovdageainnus ja lávžegeažis lea fas Nils Kai Ante Anti.
– Vuordámušat fertejit leat buorit go gilvui vuolgá, deattuha son.
Stuorra gutni
Hearggi lihkolaš eaiggát Ellen Ingrid Eira lohká stuorra gudnin vuoitit ruovttubáikkis ja lohká dan mearkkašit hui ollu.
– Gal dát lei somá. Olmmoš ilus ja balus ovdal gilvvuid ja illá oađđá. Dá lei bálká ja dat lei duođai somá, dadjá heargeeaiggát.
Ieš eaiggát ii gal loga nu olus searvat hárjehaddamii, muhto lohká baicce muhtumin biepmat herggiid go isit ii leat ruovttus.
– Lea isit ja bártnit geat hárjehallet herggiid, mun lean dušše čeavlás eaiggát, čaimmiha movttegis eaiggát.
Gávdno ain eambo vuoibmi
Olbmot vázzet meattá ja sávvet lihkku vuoittuin Klemet Amund Eirai, gii lea gávcci jahkásaš hearggi hárjeheaddji ja lea hui rámis dakka maŋŋel gilvvu.
– Maŋŋel go bođiimet Tromssas Norggameašttir vuoittuin, de lohken gánddaide ahte dál galgá heargi vuoitit ruovttus dán háve. Maŋimuš gilvvu maŋŋel mannan vahkuloahppa ii lean geavahan beare ollu návccaid ja mun gal vurden ahte galgá birget odne, dovddasta hárjeheaddji.
Klemet Amund Eira muitala sin ruovttubáikkis vuoitán dušše oktii ovdal, vaikko leamaš láhka ovddit jagiin.
– Dát bođii hui vuohkkasit, ovdal go geargá boarásnuvvat Ingrid Luostat. Dál lea mihttu fitnat suinna vel boahtte jagi Tromssas vuoitimin ja dan maŋŋel in dieđe ovddos guvlui. Dat lea goittot plána, jus bissu dearvvasin, mojohallá Klemet Amund Eira.
Geahča video finálas:
