Son ii leat gullon ja oidnon veahá áigái, muhto dál lea Annbjørg Hætta fas ruovttoluotta. Sámi artista lávke «The Voice» lávlungilvvu lávdái bearjadaga.
Guovdageaidnulaš Annbjørg Hætta leamaš eadnevirgelobis, iige leat gullon ja oidnon sámi musihkkamáilmmis. Bearjadaga searvá son «The Voice» lávlungilvui mii sáddejuvvo TV2:s kanálas.
– Dá šaddá mu comeback. Bearjadaga oaidná mo geaidnu šaddá ovddas guvlui, lohká Annbjørg go jearralat mo su musihkkaeallin ovdána.
Čiegus
«The Voice» lávlungilvvus leat njeallje duopmára. Sii čohkkájit selggos ja guldalit artisttaid. Duopmár dahje duopmárat jorgalit artistta guvlui jus liikojit dasa maid gullet. Álgovuorus válljejuvvojit duopmáriid joavkkut mat gilvalit vuostálagaid gitta finálii. Annbjørg Hætta diehttelasat ii sáhte muitalit mo suinna manná gilvvus, iige son sáhte suođđat lávlu go sámegillii vai eará gillii.
– In dieđe makkár mearkkašupmi «The Voice» gilvvus lea munnje, muhto soaitá eanet beroštupmi badjánit mu musihkkii, lohká son.
Háste su searvat
Annbjørg Hætta lea máŋgii searvan Sámi Grand Prix gilvui, son lea ovttas Slincraze:n oasálastán «Kjempesjansen» gilvvus ja 2008:s almmuhii skearrus «Gollegoallostat». Bearjadaga lea gearggus gilvalit «The Voice» gilvvus, artista muitala ahte lágideaddjit háste su searvat lávlungilvui.
– Lean oaidnán «The Voice» tv:s, ja orui hui somá searvat. Lea han hui speanta oaidnit jorgalit go duopmárat. Gilvvus lea hui alla dássi, ja jáhkkán eatnasiid ávžžuhan searvat dása, lohká Hætta.
«The Voice» sáddejuvvo TV2:s kanálas bearjadaga, duopmárat leat Espen Lind, Yosef Wolde-Mariam, Sondre Lerche og Hanne Sørvaag.
