Guovdageainnu vuorrasiidráđđi ii dohkket šat ahte suohkanbargit čohkkájit lássauvssaid duohken.
Suohkana hálddahus lea rievdadan dábiid ja dál galget olbmot, geat áigot hálddahusbargiid ságaide, diŋgot áiggi áššemeannudeaddji lusa dahje váldit oktavuođa suohkana bálvalusguovddážiin.
Boarrásiidráđđi cealká ahte uvssaid lássen lea dagahan váttisvuođaid muhtumiidda, earenoamážit vuorraset olbmuide, geat áinnas áiggošedje iežaset áššiid birra hupmat áššemeannudeddjiin.
Sii eai ge máhte váldit atnui digitálabálvalusaid.
– Daid jagiid go uvssat suohkanvissui leat leamašan rabas, de leat leamašan unnán váidagat. Oallugat dovdet dál ahte suohkanviessu lea šaddan dego fáŋgaleaira, ja gohčodit maid dan danin, čállá Boarrásiidráđđi reivves suohkanii ja ávžžuha suohkana fas rahpat uvssaid suohkanvissui.
– Gáfejuhkamiin eai ovdán barggut
Guovdageainnu suohkan ráđđeolmmái, Kent Valio, lohká Altapostenii ahte erohus dál lea ahte olbmot galget váldit oktavuođa dustehusain ja muitalit gean ságaide áigot, dahje juo ovdagihtii diŋgot áiggi áššemeannudeaddji lusa.
Valio lohká ahte buohkat besset áššemeannudeddjiid ságaide, jus fal rievttes áššemeannudeaddji lea siste dahje lea sus lea dilli váldit vuostá olbmuid.
Valio čilge ahte ulbmil rievdademiin lea ahte áššemeannudeaddji galgá sáhttit ráhkkanit ovdal go váldá vuostá olbmuid, ja maid bidjat eanet ášši áššemeannudeapmái.
– Mii leat dáppe dan váste ahte galgat bálvalit álbmoga, muhto de fertejit sii válljet háliidit go ahte suohkanviessu galgá doaibmat kafean vai galgat go mii áššiid meannudit. Ovdal lei dávjá nu ahte olbmot, geat fitne galgame earániid muhtun kantuvrras, maid guovlaledje eará kantuvrrain dušše humadeamen, lohká ráđđeolmmái Altapostenii ja lasiha ahte dat iešalddis lei somá, muhto dainna eai ovdánan barggut.
Valio lohká vel ahte son ii jáhke ahte lea álbmotgáibádus ahte sii galget boddolanjas čohkkát ja gáfestallat olbmuiguin.
