– Dat ii leat su rolla buktit ovdan iežas oaiviliid almmolaččat

NBR jođiheaddji Ellinor Marita Jåmá lea čállán cealkámuša preassadieđáhusas, masa lea reageren go FeFo direktevra Jan Olli almmolaččat buvttii ovdan ahte son lea positiiva dohkkehit Nussir ASA doaibmalobiohcama, ovdal go FeFo stivra lea meannudan ášši.

Son buktá ovdan ákkastallama maid Jan Olli lea buktán ovdan mearrádusárvalusas, gos son namuha ahte ruvkke ásaheapmi addá positiiva servodatovdáneami, mii sáhttá addit vuođu nannet sámi beroštumiid go eambbogat fárrejit boaittobeale mearrasámi guovlluide.

Iežas válddi rájiid badjel

Jåma reagere erenoamážit dasa go su oaivilat leat boahtán ovdan ovdal áššemeannudeami.

— Mun reageren hui garrasit dasa go FeFo-direktevra buktá dákkár oainnuid almmolaččat, go ášši ii leat vuos meannuduvvon ge FeFo stivrras. Dat ii leat su rolla buktit ovdan iežas oaiviliid almmolaččat. Go son dan dahká, de son dego manná stivrra barggu ovddabeallai seammás go son manná iežas válddiid rájiid badjel, lohká NBR jođiheaddji, Ellinor Marita Jåma.

Vuostálastá čielgasit oainnuid áššis

Jåma oaivvilda mearrádusárvalusa huksejuvvon heajos fágalaš vuođuin mii vuostálastá čielgasit earret eará NBR oainnu áššis.

– Mun oaivvildan ahte direktevrra mearrádusárvalus FeFo-stivrii lea huksejuvvon heajos fágalaš vuođuin ja vuostálastá áibbas čielgasit guoskevaš orohagaid, Sámedikki, NBR ja olu eará sámi organisašuvnnaid oainnuid dán áššis. Mun vuorddán ahte FeFo-stivra meannuda doaibmalobi ohcamuša našunála ja álbmotrivttiid mielde, mat mu oainnu mielde addet čielga láidehusa movt dakkár áššiid galgá gieđahallat, loahpaha Jåma.

Dán čállá NBR jođiheaddji, Ellinor Marita Jåma preassadieđáhusas.