Sámediggi cuiggoda ráđđehusa go dat ii dáhto sihkkarastit sámi giellageavaheddjiid vuoigatvuođaid suohkanođastusbarggus.
Sámediggi cuiggoda ráđđehusa go dat ii dáhto sihkkarastit sámi giellageavaheddjiid vuoigatvuođaid suohkanođastusbarggus.
– Danne ávžžuhit mii dálá sámi suohkaniid leat hui várrugasat viidáset barggus ođastusain ja vejolaš suohkanovttastahttimiin, dadjá Norgga beale Sámedikki presideanta Aili Keskitalo.
Ráđđehus lea evttohan gaskaboddosaš čovdosiid maiguin eai sihkkarastojuvvo sámi álbmoga vuoigatvuođat suohkaniid ovttastahttimis. Sámedikki čoavddusevttohus lei ahte olles ođđa ovttastahttojuvvon suohkanii galge guoskat giellanjuolggadusat, dassážii go ođđa láhkanjuolggadusat mearriduvvojit.
– Šállošit go eat nagodan soahpat dán konsultašuvnnain ráđđehusain. Dat mearkkaša ahte suohkanođastus geavahusas addá sámiide sierralágan vuoigatvuođaid vaikko ásašedje seamma suohkanis, ja dát sáhttá issorasat goaridit sámi álbmoga vuoigatvuođaid, dadjá Keskitalo.
Suohkanat, maidda dál gusket sámelága giellanjuolggadusat, leat meroštallojuvvon sámelága láhkaásahusas. Jos muhtun suohkanat ovttastahttojuvvojit suohkaniiguin maidda eai guoskka giellanjuolggadusat, de mearkkaša dat geavahusas dan ahte sámegiella ja dárogiella eai leatge ovttaárvosaš gielat ođđa ovttastahttojuvvon suohkanis.
– Buohkat áddejit ahte dát duođalaččat ja áibbas áddemeahttun vuogi mielde goarida sámiid vuoigatvuođaid geavahit sin iežaset eatnigiela. Dát lea maiddái vuostá dan maid ráđđehus lea lohpidan, ahte sámi álbmot ii galgga gillát suohkanovttastahttimiid oktavuođas. Mii fertet dušše konstateret ahte ráđđehus dán áššis ii hálit váikkuhit sámi giellageavaheddjiid vuoigatvuođaid nannema, dadjá Keskitalo loahpas.
