Boahtte mánu ii leat vejolaš čuovvut Fielvuona feargga.
Fargga galgá ođđa feargakáija Álttá suohkanis, Fielvuonas, gárvanit. Boahtte mánu bargagohtet dainna, ja dan oktavuođas giddejit káija johtolahkii.
Dat galgá giddejuvvot sulli logi beaivái, dan botta go barget.
Bissehit johtolaga
Go bargagohtet, bisána feargajohtolat čakčamánu 5. beaivvi. Dan botta go fearga ii mana, de manna leaktofanas Fielvuona, Gárggu ja Álttá gaskka.
Leaktofanas geaseha olbmuid ja gálvvu, muhto ii váldde gal fievrruid.
Fearga mannagoahtá fas nu jođánit go gerget.
