Maŋŋebárgga lei Norgga árvofámoleamos koahkkagilvu «Årets Kokk» Mathallenis Oslos. Viđa čeahpes finalisttain vuittii Christian André Pettersen gilvvu, ja šattai Norgga kandidáhtta boahttevaš internationála Bocuse d’Or-gilvvus.
Christian André Pettersen galgá ovddastit Norgga Bocuse d’Or Europe Tallinas boahtte jagi, ja máilmmegilvvus Bocuse d’Or Lyonas 2021:s.
Oassálastin Lyonas rievdada koahkka karrieara, ja alimus vuoitosadji lea stuorra olahus. Norgga Bocuse-koahkat leat oktiibuot vuoitán vihtta golli, golbma silbba ja golbma bronssa dan 15 geardde go leat oassálastán gilvvuide. Norga lea danin riika mas leat eanemus medálljat dán gilvvus.