Guovdageainnu suohkan almmuha dál ahte fitnodagain lea vejolaš fas ohcan koronadoarjaga.
«Guovdageainnu fitnodagain lea fas vejolašvuohta ohcat doarjaga buhtadusortnegis mii lea sidjiide geat leat gillán našuvnnalaš ja báikkálaš njoammunsuodjalusdoaibmabijuid geažil. Mii ávžžuhit earenoamážit daid fitnodagaid ohcat mat ovdal eai leat ožžon doarjaga dan ortnega bokte.»
Nu čállet sii iežaset ruovttusiiddus.
Doarjja galgá doaibmat ventiilaortnegin fitnodagaide mat lea gahččan áibbas dahje belohahkii olggobeallái stáda ja suohkana iežas buhtadusortnegiid. Dat galgá buhtadit báikkálaš fitnodagaid goluid dahje táhpaid mat bohtet njoammunsuodjalusdoaibmabijuid dahje giddema geažil.
Das leat earenoamážit namuhuvvon mátke-, doallo- ja guossohanealáhusat, ja eará fitnodagat mat iešguđetlágan sivaid dihte gáhččet olggobeallái buhtadanortnegiid, omd. gründarat ja eará aiddoálggaheaddjit.
Suohkana bealis ávžžuhit vel ohcciid dárkilit lohkat njuolggadusaid dan buhtadusa ektui, ovdal go ohcama sádde.
Eambbo dieđuid gávnnat Guovdageainnu suohkana ruovttusiiddus.
