Dál lea fas dego livččii beaivvi ovdal juovlaruohta olu olbmuide Finnmárkkus, go dál sáhttá fas ohcat bivdoguovllu gos háliida sarvvaid bivdit.
Lávvordaga, cuoŋománu 1. beaivvi, rahppui fas vejolašvuohta ohcat bivdoguovllu gos sarvvaid áigu bivdit.
Ođas dán jagi lea Fállejoga bivdoguovlu, gos Fállejoga eananeaiggádat leat ásahan sierra bivdoguovllu ovttas FeFoin.
FeFo hálddaša visot mii guoská bivdoguvlui, ja eananeaiggádat fas addet visot sisaboađu bivddus Fállejoga falástallansearvái.
Ovttasbargu
Eananeaiggádiid ja FeFo ovttasbargu lea ahte dál sáhttá bivdit sihke priváhta eatnamiin ja FeFo Fállejoga bivdoguovllus.
FeFo oassi eatnamis lea oktii biddjon priváhta eatnamiin, ja bivdit besset olles guovllus dál bivdit sarvvaid.
Fállejoga bivdoguovlu lea juhkkon guovtti áigodahkii.
Vuosttaš áigodat lea čakčamánu 25. beaivvis gitta golggotmánu 12. beaivvi rádjái.
Nubbi áigodat lea fas golggotmánu 13. beaivvis gitta skábmamánu 5. beaivái.
Bivdoearit badjelis
Fállejoga FeFo oasis lea lohpi báhčit njeallje ealli, ja priváhta eatnama alde fas guokte.
Daid eriid leat dál časkán oktii, nu ahte goabbat bivdoáigodagas beassá báhčit golbma ealli.
Guhkiduvvon bivdu
Ođas lea maid ahte Guovdageainnu nuorttalulábealde bistá bivdu golggotmánu 31. beaivái.
Guovdageainnu oarjjalulabealde lea bivdu golggotmánu 15. beaivvi rádjái, earret Čunočearus, Basteváris, Vuohcetvuomis ja Hirvasmarrasis.
Kárášjoga lulábealde bistá fas bivdu golggotmánu 15. beaivvi rádjái.
Guovdageainnu ja Kárášjoga davábealde gal lea nu movt ovdal, čakčamánu 30. beaivvi rádjái.
