FeFo rahpá vejolašvuođa suovvat ealáhusbarttaid nuppástuhttit meahccevistin.
Finnmárkkuopmodaga (FeFo) stivra mearridii stivračoahkkimis čakčamánu 15. beaivvi 2020 ođđa válddahusaid ealáhusbarttaid/luossabarttaid eanaláigošiehtadusaid sirdima várás, čállá Fefo preassadieđáhusas.
Válddahusat dahket vejolažžan daid nuppástuhttit meahcceviste-eanaláigošiehtadussan, main ii gáibiduvvo ahte ealáhussisaboađu galgá dokumenteret. Dat dáhpáhuvvá dávjjimusat nu ahte eanaláigošiehtadus sirdojuvvo árbbi bokte, dahje nu ahte eanaláigoheaddji ii šat deavdde gáibádusaid doallat sisabohtui vuođđuduvvon ealáhusbartta.
Go servvodat rievdá
Dat nuppástuhttin vuođuštuvvo servodaga rievdamiiguin, mat mielddisbuktet ahte leat vánes vejolašvuođat dinet ruđa dainna mii ovdal lei gánnihahtti meahcástandoaibma. Dan sivas ii leat sis geain lea ealáhusbartta eanaláigošiehtadus, vejolašvuohta duođaštit duohta sisaboađu meahcásteamis ealáhusbartta olis.
Ođđa eanaláigošiehtadusain, mat fállojuvvojit dálá ealahusbartašiehtadusaid sadjái, ii šat gáibiduvvo dokumenterejuvvon ealáhussisaboahtu. Goitge eaktuduvvo ahte barttat ain galget geavahuvvot árbevirolaš meahcásteami olis.
Eai guođohanbarttaide
Válddahusat eai gusto boazoguođohanbarttaide, sávzaguođohanbarttaide, bearráigeahččobarttaide dahje barttaide maid almmolaš eiseváldi, elfápmosearvvit j.s. leat ceggen.
Válddahusat bohtet fápmui dakkaviđe, loahpaha FeFo pressadieđáhusas.
