Nu lohká Mama Sara organisašuvnna álggaheaddji Gutnel Biret Sara Buljo, maŋŋel go ikte luobai hálddašanjođiheaddjin Mama Sara organisašuvnnas.
Nu lohká Mama Sara organisašuvnna álggaheaddji Gutnel Biret Sara Buljo, maŋŋel go ikte luobai hálddašanjođiheaddjin Mama Sara organisašuvnnas.
Ikte, duorastaga, lei organisašuvnnas jahkečoahkkin gos válljejedje ođđa hálddašanjođiheaddji ja stivrra. Sara Buljo lea hui duhtavaš go sii leat gávdnan olbmo gii sáhttá ja heive váldit badjelasas dan jođihanbarggu.
– Mun dieđusge boađán ain leat mielde, muhto dál lean dušše Mama Sara. Lean hui ilus go nuorat olbmot čájehit beroštumi doalvut dán barggu ain ovddasguvlui, ja ieš in dárbbaš šat rahčat báhpiriiguin ja dihtoriin.
– Eallimis áigi juohke diŋgii
Mama Sara muitala son lea ieš dán maŋemus jagi dovdan iežas badjelmeare váiban, earret eará ovttasbargohástalusaid geažil Tanzanias mat ledje mannan dálvvi.
– Eallimis lea nu ahte lea áigi juohke diŋgii, ja lean jurddašan ahte lean dál nu guhká bargan dáinna in ge orron šat ieš arvame joatkit jođiheaddjin. Lean maid jurddašan ahte háliidan earáide addit jođiheami go ieš ain lean julggiid alde ja dearvvašvuohta buorre, vai beasan veahkehit ođđa olbmuid bargguiguin viidáseappot. Mii galgatge, ođđa stivra ja hálddašanjođiheaddji, vuolgit masaiaid lusa dán giđa mielde, muitala Mama Sara.
Stuora ovdáneapmi
Sara Buljo ii vel dáhto almmuhit gean leat válljen, muhto čilge ođđa hálddašanjođiheaddjis lea rievttes oahppu bargat ovdánahttinbargguid.
– Mu mielas lea dat stuora ovdáneapmi organisašuvdnii, ja čoahkkimis lei sihke ođđa stivrras ja jođiheaddjis hui buorre mokta joatkit bargguiguin.
Ođđa hálddašanjođiheaddji ja stivrralahtut almmuhuvvojit maŋŋel.
