Njuikejeaddji ja Áltálaš Anna Odine Strøm (19) ja riidejeaddji Moy Susanne Birkenes (30) Deanus eret beassaba illudit go sutnuide geigejuvvui 50 000 ruvdnosaš stipeanda.
Njuikejeaddji ja Áltálaš Anna Odine Strøm (19) ja riidejeaddji Moy Susanne Birkenes (30) Deanus eret beassaba illudit go sutnuide geigejuvvui 50 000 ruvdnosaš stipeanda.
26 ohcci gilvvohalle guovtti stipeandda badjel maid Ulvangfoanda geigii dán jagi. 11 ohcci ledje čatnon čuoigamii.
Okta sis lei Álttá nieida Anna Odine Strøm, gii iežas buriid bohtosiiguin njuikemis ja ambišuvnnaiguin geahčestuvvui gelbbolaš vuostáiváldi stipendii.
– Mu njuikenbivttas lea fabrihkas ráhkaduvvon, dain earáin máilmmicupas gal leat erenoamášgorrojuvvon biktasat. Dál galgá munnje maid dakkár, illuda Strøm go gullá ahte sutnje geigejuvvo dán jagáš Ulvangstipeanda.
Son lea fárren lulás iežas bearrašin, muhto njuiku Alta IF ovddas.
– Mu lei bággu fárret jus ollesáiggis galggan sáhttit valáštallat. Muhto mun ovddastan Alta IF ja lean rámis leat Finnmárkulaš, dadjá son preassadieđáhusas.
Stipeanda vuosttaš geardde riidejeaddjái
Ii goasse ovdal leat riidejeaddji ožžon Ulvangstipeandda. Dán jagi lei áigi dasa.
Dáinna stipeanddain maid Ulvangfoanda geigii, sávvá foandda komitea ahte riidejeaddji Moy Susanne Birkenes, Deanus eret, oažžu vejolašvuođa kvalifiseret ja searvat nuorraheasta Máilmmimeašttir gilvvuide, dasa lassin go ieš beasašii duohtandahkat iežas plánaid maid.
– Olu, olu giitu, dát gal lei hui somá. Dál mus lea vejolašvuohta searvat eambbo gilvvuide lulde. Dál áiggun maid plánegoahtit geasi, muitala dat duhtavaš nieida.
Birkenes lea dán rádjái ovddastan Deanu heastasearvvi (Tana Hestesportsklubb), muhto lea dál mearridan lonuhit Hámmárfeasta riidensearvái dán áigodaga, vai beassá searvat Norggameašttir joavkogilvvuide čakčat.
Ulvangstipeanda galgá veahkehit valáštalliid Finnmárkkus olahit buriid bohtosiid.
Reantovuoittu ja oktiičaskima gaskal Finnmárkku valáštallanbiire ja Romssa valáštallanbiire geažil ođđajagimánu 1. beaivvi 2020 rájes, heaittihuvvo foanda go leat vel juohkán guokte stipeandda boahtte jagi.
