Lohkiidlogut čájehit ahte sámi aviissain lassánit Ságat aviissas lohkkit ja Ávvir fas bisuha lohkkiid. Ságat aviissas lea dál mihttu olahit 3000 lohkki.
Lohkiidlogut čájehit ahte sámi aviissain lassánit Ságat aviissas lohkkit ja Ávvir fas bisuha lohkkiid. Ságat aviissas lea dál mihttu olahit 3000 lohkki.
Otne ilbme aviissaid lohkkiidlogut mannan jagi ovddas, ja čájehuvvo ahte Ságat aviissas lassánit lohkkit. Sii ožžo obbalaččat 95 ođđa lohkki, ja sis leat oktiibuot 2928 diŋgojeaddji geat lohket sin aviissa, sihke báber- ja digitálaaviissa.
– Mihttu joksat dán jagi juo
Ságat aviissa váldodoaimmaheaddji Geir Wulff jáhkká ovdáneami boahtit das go sii nagodit bures deaivat dárbbuid mat sápmelaččain leat, go čállet áššiid maid olbmot beroštit lohkat.
– Nu áigut mii joatkit ja mii lahkonit dál fargga 3000 lohkki, nu ahte mis lea mihttu joksat dan logu, goit boahtte jagi, jus juo eat jovssa dan dán jagi, lohká Ságat aviissa váldodoaimmaheaddji Geir Wulff.
Digitálalaččat lassáneapmi
Wulff lea hirbmat duhtavaš loguiguin ja ilus go eambbo olbmot lohkagohtet sin aviissa.
– Mii oaidnit báberaviissas massit mii 72 lohkki, muhto digitálalaččat mii oaččuimet 167 ođđa lohkki, mii lea hui buorre, lohká son.
Ávvudit gáhkuin
Wulff muitala sii loahpas 2015 leat olles aviissa bidjan máksin ládje mii lea neahtas digitálalaččat, ja oaidná dat orru doaibman mannan jagi.
– Loguid mielde orrot olbmot liikome dasa, go lea buorre ovdáneapmi mis, nu ahte gal ávvudit gáhkuin dáppe, lohká Ságat aviissa váldodoaimmaheaddji Geir Wulff.
Duđavaččat go bisuhit
Ávvira logut čájehit ahte oktiibuot leat sis leat 1031 lohkki ja masse guokte lohkkii. Ávvira váldodoaimmaheaddji Kari Lisbeth Hermansen lea duđavaš go Ávvir dušše massá guokte lohkki.
– Go geahččá makkár dilis báberaviissat ja obbalaččat olles media lea dál, de leat duđavaččat go eat leat manahan eanet lohkkiid, go daid maŋemus jagiid leat lohkkiidlogut čierastan vulos guvlui, lohká son.
Váttis giela dihte gilvalit
Hermansen maid illuda Ságat aviissa loguid ovddas, muhto oaidná ahte lea váttis gilvalit singuin giela dihte.
– Mii čállit dušše sámegillii, ja mii oaidnit ahte sámegiella ii dađi bahábut nagot gilvalit dárogielain ođasmáilmmis, lohká son.
Digitála vuoruheapmi boađi boađi
Lohkkiidlogut čájehit ahte Ávviris leat lassánan 924 lohkki digitálalaččat, muhto Ávvira beaivválaš jođiheaddji Tor Sara daid ii loga sáhttit geahččat duođas go easka gasku mannan jagi rievddai Ávviris abonnemeantavuogádat. Go geahččá obbalaš loguid, de leat Sara mielas positiiva logut.
– Ovddit jagi, 2015:s, niejaimet 51 lohkkiin, mii lea 4,7 proseantta. Dál lea dat lohku measta nulla proseantta, mii lea hui buorre. Mii áigut maid Ávviris bidjat eanet návccaid iežamet digitála vuoruheapmái, mii lea dat ođđa geaidnu. Plána mielde galgá dat boahtit dán jagi mielde, lohká Sara.
Niedjan bisánan
Sara lea maid geahččan lohkiidloguid muđui Finnmárkku aviissain, ja vuohttá ahte lohkkiid niedjan, mii lea leamaš juo ollu jagiid, orru bisánan.
– Muhtin aviissain leat maid jorggihan njiedjanlogut, ja treanda čájeha ahte olbmot leat šaddan mielas máksit doaimmahuslaš áššiid ovddas digitálalaččat. Dat lea hui buorre mediasuorgái, lohká Ávvira beaivválaš jođiheaddji Tor Sara.
Finnmárkku Áviissat | Netto obbalaččat 2016 | Netto obbalaččat 2015 | Rievdan netto opplag | Bábir obbalaččat 2016 |
Rievdan bábir |
Digitála obbalaččat 2016 | Rievdan digitála-laččat |
Altaposten | 3 731 | 3 776 | (45) | 3 188 | (321) | 3 592 | (31) |
Ávvir | 1 031 | 1 033 | (2) | 953 | (13) | 991 | 924 |
Finnmark Dagblad | 5 407 | 5 403 | 4 | 3 823 | (797) | 5 062 | 43 |
Finnmarken | 4 939 | 4 897 | 42 | 3 903 | (368) | 4 682 | 54 |
Finnmarksposten | 1 176 | 1 143 | 33 | 1 151 | 21 | 25 | 12 |
Hammerfestingen | 1 245 | 1 209 | 36 | 1 235 | 37 | 10 | (1) |
Kronstadposten | 1 580 | 1 332 | 248 | 1 566 | 244 | 14 | 4 |
Kyst og Fjord | 1 932 | 1 765 | 167 | 1 702 | 121 | 1 818 | 1 634 |
Ságat | 2 928 | 2 833 | 95 | 2 491 | (72) | 437 | 167 |
Svalbardposten | 2 595 | 2 544 | 51 | 2 292 | (54) | 303 | 105 |
Sør-Varanger Avis | 3 178 | 3 594 | (416) | 3 018 | (446) | 2 939 | (376) |
Østhavet | 1 426 | 1 447 | (21) | 1 401 | (32) | 25 | 11 |