Ruoŧa Sámediggi lea sádden reivve Standing Rock Sioux Tribe jođiheaddjái ja dan bokte čájehit doarjaga Sioux čerdii, geat dáid beivviid vuosttaldit go oljofitnodagat báhkkejit sin eatnamiidda.
Ruoŧa Sámediggi lea sádden reivve Standing Rock Sioux Tribe jođiheaddjái ja dan bokte čájehit doarjaga Sioux čerdii, geat dáid beivviid vuosttaldit go oljofitnodagat báhkkejit sin eatnamiidda.
Stefan Mikaelsson, Per Olof Nutti, Mona Persson, Lars Wilhelm Svonni Ruoŧa Sámedikki bokte leat sádden reivve Standing Rock Sioux Tribe jođiheaddjái Dave Archambaultii. Reivves doarju Ruoŧa Sámediggi dan vuostálastima maid álgoálbmot čearda čájeha go eiseválddit leat addán eatnamiid oljofitnodahkii, vai besset oljorevrriid cegget Sioux čeardda eatnamiid ala. Sioux álgoálbmotčearda ii leat ovttaoaivilis daidda huksemiidda, ja oaivvildit eatnamiid ja čáziid billahuvvat roggamiid dihte.
– Mii leat eatnamat ja eatnamat leat mii
– Odne leat Sámedikki jođiheaddjit čuoččahan doarjun dihte Standing Rock Sioux čeardda ja min rievtti beassat hupmat iežamet áššiid ovddas ja doahttaleami oažžut áššiin main mii dihtet mii lea buoremus midjiide ja min kultuvrii, álgá reive ja joatká:
– Mii geat leat álgoálbmogat, muitalit min rievtti mearridit ja eaiggáduššat, bearráigeahččat ja stivret min máttuid eatnamiid ja ássanguovlluid, čáziid ja eará resurssaid. Min eana lea vuođđun min eksistensii. Mii leat eatnamat ja eatnamat leat mii: mis leat čielga vuoiŋŋalaš ja ávnnaslaš čanastat eatnamiidda ja dat leat čoavdemeahttumit čadnon min birgejupmái, čuožžu reivves ja čujuhit Kimberley-julggaštusa.
Olmmošriekti
Ruoŧa Sámedikki jođiheaddjit gáibidit maid ahte internašunála olmmošriekteinstrumeanttat váldojit vuhtii buot ON-miellahtturiikkain, ja deattuhit ahte ii sáhte šat dohkkehit ahte min olmmošrievttit šiitojuvvojit.
– Álgoálbmogiin leat riekti beassat návddašit, jogo okto dahje ovttas, buot olmmošrivttiid ja vuđolaš friddjavuođaid mat leat dohkkehuvvon ON bealis, Máilmmijulggaštusas olmmošrivttiid ja internašunála olmmošrivttiid bealis (UNDRIP artiihkkal 1).
Gáibidit vašánis doaimmaid heaittihuvvot
– Ollu jagiid leat mii čohkken gelbbolašvuođa Sámi parlamentáralažžan go leat máŋggaid jagiid jođihan Sámedikki Ruoŧas. Mii gáibidit dasttanaga heaittihit vašánis doaimmaid mat gullet Standing Rock Sioux čerdii. Mii sihtat internašunála servvodaga bargagoahtit min oappáid ja vieljaid čálggu ovddas, doarjut eamiálbmotkultuvrraid ealáskahttima ja beassat bearráigeahččat min iežamet árbevirolaš eatnamiid ja čáziid, čállet Ruoŧa Sámedikki jođiheaddjit reivves.
– Dál lea doarvái, eai galgga šat gatnjalat.
