Otná rájes gáibiduvvo politiijaatteasta buot ođđa bargiin dearvvašvuođa- ja fuolahussurggiin. Politiijaatteasta galgá muitalit veahkaválddálašvuođa áššit, narkotihkkaáššit ja veagalváldinrihkkus áššiid birra.
Otná rájes gáibiduvvo politiijaatteasta buohkain geat suohkaniid dearvvašvuođa- ja fuolahusbálvalusain galget bargat.
Dássážii lea politiijaatteasta duššo gáibiduvvon sis geat mánáiguin ja doaimmashehttejuvvon olbmuiguin galget bargat. Dál gáibiduvvo atteasta buot bargiin geat pasieanta- ja geavaheaddjisuorggis galget bargat.
– Láhkarievdadus mearkkaša ahte maiddái sii geat galget bargat boarrásiiguin, psykiátralaš ossodagas ja persovnnalaš assisteantan, fertejit addit politiijaatteasta, lohká Leif Sætrum, Politiijaid meannudusduođaštus- ja politiijaatteastaossodaga jođiheaddji.
Rihkkus áššit
Atteastas galget boahtit ovdán veahkaválddálašvuođa áššit, narkotihkkaáššit ja veagalváldinrihkkus áššit. Maiddai dieđut bággema, nihttima, suoládeami, rievideami, ja beahttuma birra galget boahtit ovdán.
Stuoradiggi mearridii ođđa ortnega geassemánus, ja dat doaibmagođii odne, ođđajagimánu 1. beaivvi. Rievdadus guoská duššo ođđa virgádemiide.
Bargoaddi ii sáhte gáibidit ođđa politiijaatteasta sis geat ovddeš njuolggadusaid mielde leat addán politiijaatteasta.
Neahtas ohcat atteasta
Politiijaatteasta sáhttá ohcat politiijaid neahttasiiddus.
– Mii ávžžuhit elektrovnnalaččat ohcat. Politiijaatteasta boahtá digitála poastakássii. Nu oaččut atteasta johtileabbo. Sáhtát maid neahtas geahččat ohcama statusa, lohká Sætrum.
