Borgemánu 19.-21. beivviid bovde Ijahis idja festivála gussiid 13. gearddi jo guossái Anárii gos festivála lágiduvvo. Áigumuš lea fállat máŋggabealat fálaldaga.
Borgemánu 19.-21. beivviid bovde Ijahis idja festivála gussiid 13. gearddi jo guossái Anárii gos festivála lágiduvvo. Áigumuš lea fállat máŋggabealat fálaldaga.
Ijahis ijda festivála álggahuvvui 2004:s ja lea áidna sámemusihkkafestivála Suoma bealde. Dán jagi leat festiválalágideaddjit viiddidan prográmma.
– Mun jáhkán, dál go mii leat čielgasit viiddideamen Ijahis ija eará kultursurggiide, de dainna sáhttit bálvalit gussiid buorebut. Mii háliidit hukset máŋggabealat fálaldaga mii dasto addá festiválagussiide hui buori vásáhusa, čilge festiválabuvttadeaddji Oula Guttorm.
Musihkka, teáhter, ságastallan ja valáštallan
Dan jagáš festiválaprográmma ođastus lea dat ahte festivála báikkis fállojuvvo gussiide searvat ja vásihit iešguđet dáhpáhusaid.
Giron Sámiteáhter čájeha Ijahis ijas ođđa bihtá, «Doala dolat heakkas». Das leat Ailo Gaup-rohki divttat ja čállosat vuođđun. Giron Sámiteáhter háliida čájálmasain gudnejahttit Sámi teáhterpioneara Ailo Gaupa. Dasto Yle Sámi arena fállá searvat ságastallandilálašvuhtii, mas gieđahallet áigeguovdilis fenomenaid ja olbmuid. Ságastallamat leat buot golmma Suomas hállon sámegillii.
Lassin dáidda lágidemiide ja musihkkakonsearttaide, mat leat juhkkojuvvon dan háve guovtti beaivái, lágidit vuosttaš háve valáštallangilvvuid. Dat leat suohpan sprint ja njoarosteapmi.
Ii leat mihttu stuorrut
Mannan jagi Ijahis idja festiválas fitne 2 900 guossi. Festiválabuvttadeaddji ii loga guosselogu gal sin váldoulbmilin.
– Mii gal dieđis viggat seamma guossemeari olahit, muhto ii leat dieđus festivála ulbmil dien láhkai stuorrut ja stuorrut olles áiggi. Baicca viggat bisuhit dan seamma guosselogut, muitala Oula Guttorm.
Sihke buvttadeaddji ja čuojaheaddji
Ijahis Idja festivála buvttadeaddji lea oahpis Somby, Irdon, Trio Boogiemen musihkkajoavkkuid bokte gos Oula Guttorm čuojaha gitárain. Ávvir jearrá ge lea go lossat kombineret dáid bargguid?
– Mannan jagi mun maid čuojahin go ledjen ge buvttadeaddjin. Dat gal manná. Eai nu ollu leat Suoma bealde dieđusge musihkkajoavkkut, measta 50. Muhtumin šaddá čuojahit vaikko lea ge buvttadeaddji. Muhtun láhkai dat lea lossat. Muhto dainna birge, ja álo lea somá čuojahit konsearttas, loahpaha Guttorm.
Guttorm galgá čuojahit earret eará Irdon ja Amoc & Trio Boogiemen joavkkuin Ijahis ija festiválalávddi alde. Dasa lassin festiválas čuojahit Sofia Jannok, Ylva, Ulla Pirttijärvi & Ulda, Ánnámáret Ensemble, Johan Anders Bær & Dronefolk joavkkuinis, Ágy ja Felgen Orkester. Konseartaprográmmas leat ge maiddái luohtečeahpit Nils-Heikki Paltto, Hanna-Maaria Kiprianoff ja Neeta Jääskö.
