Nord-Fron suohkan ja Joar Nango váidet dáidaga billisteami.
Nord-Fron suohkan ja Joar Nango váidet dáidaga billisteami.
Dáiddár Joar Nango lea maŋemuš beivviid beaggán viidát, go lea dáidaga ráhkadeame Kvamas, Nord-Fron suohkanis Opplánddas.
Mánnodaga válde dáidaga eret, sihkarvuođa dihte. Soames lei časkán bátti gaskat mii doalai dáidaga badjin.
– Mii leat gulahallame Midt-Gudbrandsdala leansmánniin, gii galgá váidit billisteami. Mii eat dieđe galgat go mii vái dáiddár váidit. Leat sáhka stuora árvvuin, eat ge sáhte dušše diktit leat, lohká Nord-Fron sátnejođiheaddji Rune Støstad VG aviisii.
– Lea váivi
Dáiddár Joar Nango lea beahtahallan go dáidda ii beasa ráfis leat.
– Lea hui váivi. Báttiif mat sihkkaraste dáidaga leat čuhppon gaskat, ledje duolva nissonolbmo čurtebuvssat ja ledje darvvihuvvon báberbihtát mas čužžo fasttes kommentárat. Mii oaivvildit ahte lea suohkana bargu váidit dán politiijaide, muhto jus eai váldde ovddasvástádusa, de fertet ieža dan dahkat, lohká Nango aviisii.
Son lohká ahte Kvam priváhta ealáhusdoallit leat fállan váldit badjelassii dáiddaprošeavtta. Leat árvvoštallame fálaldaga.
– Olu eallin
GD aviisa čállá ahte olu báikkálaš olbmot leat álggahan plána oažžut dáidaga eará sadjái Kvamii.
– Mii oaidnit ahte dat boktá beroštumi, ja olusat háliidit oaidnit dan. Dán dárbbaša gilli, ja lea buorre Kvamii, lohká Lars Tungen, Abaris fitnodagas. Son lea okta sis geat háliidit bisuhit dáidaga.
Son lea disdaga ságastallan eará fitnodagaiguin guovllus.
– Mus lea kantuvra párkka guoras, ja oainnán dáidaga ja ahte olbmot bohtet deike. In leat ovdal oaidnán ná olu eallima dáppe. Lea boktán beroštumi, lohká son báikkálaš aviisii.
Gulahallame
Nord-Frons sátnejođiheaddji Rune Støstad lohká ahte leat gulahallan joavkkuin geat háliidit váldit badjelassii dáidaga.
– Mii fertet váldit dán jearaldaga duođas, ja árvvoštallat dán. Lea sáhka heaittihit ovttasbarggu dahje joatkit prošeavttain maid sii leat hábmen.(©NTB)
