Guokte jagi leat dáiddárat leamaš vistti haga, muhto dal leat ceggen áibbas ođđa gaskaboddosaš vistti.
2021 giđa gárttai Dáiddadállu dálu haga go viessoláigu measta duppalastojuvvui ja nu ii lean šat eaktun láigohit gáržžes visttiid gos dáiddárat leat dálludan dan rájes go álggahedje Dáiddadálu 2014:s.
Nubbi stuora váttisvuohta čájehuvvui leat ahte Guovdageainnus eai gávdnon láigovisttit sin dárbbuid ektui, ja dat vátna visttit mat gávdnojedje láigumassii, livčče šaddan divuhuvvot máŋggaid čuđiid duháhiid ovddas.
Danne Dáiddadállu čohkkii searaid, digaštallat ja jurddašit áibbas earáládje. Badjelaš jagi maŋŋel de leat ceggen áibbas ođđa gaskaboddosaš vistti ja beassážiid rahppo fas viimmat Dáiddadállu Guovdageainnus.
– Eai gávdnon buoret molssaeavttut go ieš cegget dálu. Dáppe eai gávdno visttit mat livčče min dárbbuid gokčan ja visttit mat livčče soaitán heivet, eai doallan bargobiraslágaid dási. Livččiimet ieža šaddan divuhit priváhta aktevrraid dáluid stuora supmiid ovddas dahje máksit alla láigohatti gokčan dihte divuhangoluid, de goitge ii livčče leamaš sihkarvuohta ahte beassat doppe dálostallat guhkit áigái ja buori haddái. Dat ii orron min mielas nu jierpmálaš eaktu ja mii oinniimet ahte dás ii leat go jurddašit áibbas eará ládje, lohká Dáiddadálu stivrajođiheaddji ja vuođđudeaddji, Máret Anne Sara, preassadieđáhusas.
Guokte jagi vistti haga
Dáiddadállu rahppo almmolaččat beassážiid, čájáhusain sihke olgun ja siste, ja vel dáiddalávgumiin man Dáiddadállu lágida ovttas Sámi allaskuvllain. Dasa illosa Sara, gii muitala ahte lea leamaš váttis doaimmahit Dáiddadálu dan guokte jagi go leat leamaš vistti haga.
– Dat ii leat máilmmi stuorámus vistti, muhto mii leat hui duhtavaččat ja giitevaččat. Mis lea dál buorre bargosadji iežamet bargiide, čájáhusbáiki dáidagii ja deaivvadanbáiki dáiddáriidda, gussiide ja ovttasbargiide. Dál eat dárbbaš biehttalit váldit vuostá gussiid ja ovttasbargiid, muhto baicce bovdet buohkaid buriin mielain Guovdageidnui ja min lusa, lohká Sara.
Gaskaboddosaš vistti
Ođđa visti lea goitge gaskaboddosaš čoavddus. Dáiddadálus lea stuora ja jođánis ovdáneapmi. Dáiddárat barget máilmmi alla dásis ja sin ollislaš doaibma gáibida mealgat stuorát saji ja albma buvttadan- ja čájáhuslanjaid. Dáiddadálu mihttu ja sávaldat lea fátmmastit dáiddáriid miehtá Sámi ja dainnalágiin ovddidit Sámi dáidaga sámiid iežaset eavttuid vuođul.
Dáiddadállu leage vuordime dassái go dálá Sámi joatkkaskuvla ja boazodoalloskuvla fárre ođđa vistái. Doppe livččii sihke stuora lášmmohallanlatnja ja bargolanjat mat heivešedje dáidaga buvttadeapmái ja čájeheapmái. Go visttit guorranit, de lea ulbmil ahte Dáiddadállu fárrolagaid Sámedikkiin ja Statsbyggain geahčadišgohtet ja guorahallagohtet lea go vejolaš ahte Dáiddadállu fárre dohko bissovaččat.
– Dan maid dál leat huksen, lea gaskaboddosaš visti. Lea dehálaš ahte oažžut olu stuorát viesu gosa čáhkkehit min bargiid, dáiddáriid, min dáiddabuvttadeami ja ollislaš doaimma. Mii háliidit fátmmastit dáiddáriid miehtá Sámi ja mii háliidit leat mielde ovdánahttime sihke sámi dáiddáriid ja sámi dáidaga máilmmi dásis. Dat mearkkaša earret eará ahte mii láhčit buoret dili dáiddáriid buvttadeapmái ja ahte mii áimmahuššat dehálaš fierpmádaga gos láhčit sámi dáidaga beaggima máilbmái. Min ulbmil lea maid profešonaliseret dáiddalaš fitnodagaid ja nu nannet dáiddárekonomiija, dadjá Máret Anne Sara.
