Kasakhstána dáiddara Nelly Bube govat leat dál dáiddačájáhussan Kárášjoga girkus. Báhppa muitala leat vuosttaš geardin go dán girkus lea dáiddačájáhus.
56 gova maid Kasakhstána dáiddár, Nelly Bube lea ráhkadan čájehuvvojit Kárášjoga girkus, Finnmárkkus.
Čájáhus lea rabas olles geasi.
– Lea hui gelddolaš go mii leat ožžon dán čájáhusa deike Kárášjohkii. Mus leat vuordámušat maid dat áigu muitalit midjiide, dajai proavásbáhppa Jan Høifødt go rabai čájáhusa geassemánu 2. beaivvi.
Nomádat
Iežas ruovtturiikkas lea Nelly Bube earret eará beaggán iežas govaiguin main boahtá ovdan nomádakultuvra mii lea báidnán Kasakhstána.
Jan Høifødt mielas lea hui erenoamáš go guovddáš Asia nomádakultuvrra govat čájehuvvojit sámi guovllu girkus Norggas.
– Sápmelaččat han leat maid nomádaálbmot. Govat mat bohtet sullasaš kultuvrras eará sajis máilmmis sáhttet muitalit midjiide dáppe Kárášjogas juoga, dadjá Høifødt, ja deattuha ahte Kárášjoga searvegoddi ii leat hárjánan dákkár dáiddačájáhusaide girkus.
– Mii eat leat hárjánan dasa. Mun jáhkán dat lea vuosttaš geardde go mis lea dákkár čájáhus dáppe Kárášjoga girkus. Go rahpat girku dáiddačájáhussii, de eat sáhte vuordit ahte dát heive buohkaide. Mii fertet dohkkehit ahte buohkaid mielas ii leat dát seamma somá, lasiha son.
Pedagogihkka
Searvegottepedagoga Olaug Eriksen Kárášjogas áiggošii geavahit dáid 56 gova skuvllain ja mánáidgárddiin Kárášjogas.
– Dá leat čáppa govat mat muitalit biibbalhistorjjá. Mun doaivvun ahte dát govat heivejit mánáide ja nuoraide dáppe. Go dá lea áibbas ođđa bargovuohki, šaddá gelddolaš oaidnit movt dán váldet vuostá, dadjá Olaug Eriksen.
Turisttaid váste maid
Dat 56 gova leat gávdnamis máŋgga lanjas girkus guovdu Kárášjoga.
– Dasa lassin go áigut daid govaid geavahit iežamet searvegotti pedagogalaš bargguide, de leat govat turisttaid ja earáid váste maid, geat finadit girkus geasset, dadjá Eriksen.
Miehtá riikka
Biibbalsearvi leat ilus go besset čájehit Nelly Bube-čájáhusa Finnmárkkus. Ovdal go bođii Kárášjohkii, lei dat Álttás, Nordlyskatedralenis.
– Biibbalsearvái lea hui dehálaš oažžut ovdan ahte mis lea dehálaš bargu olles Norggas. Earret eará jorgalit dan 200 jahkásaš historjjá sámegillii. Muhto mii áigut maid geahččalit eará vugiid. Danne leat hui ilus go Kárášjoga searvegoddi leat váldán vuostá dán čájáhusa, dadjá biibbalmiššuvnnajođiheaddji Bernt Greger Olsen Biibbalsearvvis.
Son deattuha seammás ahte go Kárášjoga searvegoddi čájeha Nelly Bube-čájáhusa, ferte dat dahkkot nu go heive iežaset báikkálaš kultuvrii.
