Nuoraidskuvlla ohppiid váhnenjoavku Billávuonas moaitá Porsáŋggu gieldda go eai leat dieđihan juohke oahppi váhnemii ahte gielda lea čálihan Billávuona bajásšaddanguovddáža nuoraidskuvlla ohppiid Leavnnja skuvlii nu mo láhka geatnegahttá.
Nuoraidskuvlla ohppiid váhnenjoavku Billávuonas moaitá Porsáŋggu gieldda go eai leat dieđihan juohke oahppi váhnemii ahte gielda lea čálihan Billávuona bajásšaddanguovddáža nuoraidskuvlla ohppiid Leavnnja skuvlii nu mo láhka geatnegahttá.
Billávuona bajásšaddanguovddáža nuoraidskuvlla ohppiid váhnemat, gaskal Gorbovuona ja Jovnnanjárgga váhnenjoavku, Per A. Amundsen, Anne Haraldsvik, Nadja Hansen, Kari Olsen ja Einar Andersen leat čuojahan ja sádden breava Porsáŋggu gieldda bajásšaddanhovdii dán vahkku. Breavas moaitá váhnenjoavku Porsáŋggu gieldda go eai leat dieđihan gielddastivra mearrádusa ođđa skuvlabiirerájá birra, eai ge leat dieđihan juohke oahppi váhnemii dan rievdadeami birra nu mo hálddahuslága paragráfa 39 geatnegahttá.
– Easkka gaskavahkku, go ohcaleimmet dan, de iđii dat gieldda ruovttusiidui. Lea gelddolaš oaidnit oažžut go lága geatnegahtton dieđiheami ahte oahppit leat čálihuvvon Leavnnja nuoraidskuvlii. Gielda lea láhttenvugiinis rivven váhnemiin demokráhtalaš vuoigatvuođa guoddalit ášši. Oahpahuslága mielde lea mánáin vuoigatvuohta vázzit skuvlla dan skuvllas gosa leat čálihuvvon. Odne, duorastaga, leamaš ohppiin skuvla Billávuona bajásšaddanguovddážis, ohppe eambbo mearrasámi kultuvrra birra, lohká váhnenjoavkku ságadoalli Per A. Amundsen, gii maid lea advokáhtta.
– Ádden váhnemiid dili, muhto in doarjjo váhnenjoavkku akšuvdnavuogi man tulkon politihkalaš čalmmustahttimin, lohká Bargiidbellodaga sátnejođiheaddjeevttohas Aina Borch.
– Mii leat sádden gaskaboddosaš sierramearrádusa juohke oahppi váhnemii. Oahppit bohtet skuvlii odne bearjadaga. Seammás ferten lohkat ahte anán váhnemiid vuogi unohassan, lohká gieldda bajásšaddan- ja kulturhoavda Jonas Nymo gii maiddái lea Porsáŋggu Olgešbellodaga politihkalaš jođiheaddji.
Váhnenjoavkku cuiggodeapmi
Advokáhtta Per A. Amundsen čilge ahte vaikko sii, váhnemat, leamaš mielde gulaskuddanbarggus, de eai leat ožžon dieđu maid gielda lea mearridan.
– Gielda dieđihii ruovttusiiddustis borgemánu 19. beaivvi ahte ođđa skuvlabiireortnet lea mearriduvvon, nu ahte dál lea njuolggadus midjiide dieđihuvvon lágalaččat. Šállošan go gielda ii gillen dieđihit midjiide dan suoidnemánus, muhto geahččalii mis rivvet lágalaš guoddalanvuoigatvuođa. Easkka go gielda lea mearridan sierramearrádusa, de sáhttá gielda sirdit oahppi nuppi skuvlabiirii ja váhnemis lea golbma vahkku guoddalanáigi. Das maŋŋá sáhttá oahppi lobálaččat sirdit nuppi skuvlii, čilge váhnen Per A. Amundsen.
Čilge sii atnet hirbmat unohassan go Porsáŋggu gieldda bajásšaddanhoavda, Jonas Nymo, geahččala mánáid ala duvdit gieldda iežas čurbošeami. Muitala iežas aiddo ožžon teakstadieđu Porsáŋggu skuvlla rektoris ahte sii mieđihit iežaset čurbošan dán áššis.
Ii leat válgagižžu
Bargiidbellodaga sátnejođiheaddjeevttohas Aina Borch deattuha ahte dát ii leat oassi válgagiččus, dat deaivvai justa dál bohciidit. Lohká bealistis lea dehálaš ahte gielddas leat buorit bargovuogit ja áššit čovdojuvvojit maŋŋálagaid nu mo galggašedje.
– Mun ádden váhnemiid dili, muhto mu mielas livččii sáhtán dán ášši čoavdit njuovžilabbot, lohká Porsáŋggu gieldda bajásšaddanhoavda, Jonas Nymo.
(Ášši lea almmuhuvvon báberaviissas 22.08.15)
