Olmmoš lea válddihan PCR-iskosa ja suohkan vuordá bohtosiid ihttá beaivvi mielde.
Guovdageainnu suohkan čállá sin neahttasiiddus ahte ovtta olbmos lea duođaštuvvon koronanjoammun jođánisiskosis. Olmmoš válddihii jođánisiskosa odne, borgemánu 9. beaivvi, Guovdageainnu dearvvašvuođaguovddáža vuoiŋŋahatklinihkas. Olbmos lea váldon PCR-iskkus, mas vurdet bohtosiid ihttá beaivvi mielde.
Olbmos leat lagasoktavuođat Guovdageainnus, ja sis leat maid váldon iskosat ja leat biddjon erremii. Sátnejođiheaddji Hans Isak Olsen ii loga diehtit galle olbmo leat lagasoktavuođat.
Sus guhte lea duođaštuvvon, lea boahtán Guovdageidnui eará báikkis Norggas.
– Dat ii leat duođaštuvvon ovdal go PCR-iskosa bohtosat bohtet. Lea čájehuvvon máŋgii iešguđet sajiin ahte sáhttet leat behtolaš jođánisiskosat, dadjá Olsen.
