-Almmuhus-
-Almmuhus-
KULTUVRA Čohkkejit nuoraid Sállanii bargobadjái

Čohkkejit nuoraid Sállanii bargobadjái

-

-

Oahppat movt mobiltelefuvnnain sáhttá govvet, oahppat čuojahit musihkkajoavkkus ja Bollywood čoavjedánsuma ožžot nuorat oahppat Sállanis Sørøyrockenis dán geasi.

Sállanis lágiduvvo Sørøyrocken suoidnemánu 28. – 31. beivviid, ja nuoraide lea maid fálaldat masa sáhttet searvat.

– Nuorat leat ieža beassan evttohit makkár doaimmaid háliidit oahppat bargobajis, ja leat golbma doaimma maid čađahit, muitala Sørøyrockena bargobaji ovddasvástideaddji Birgit Kristensen Ávvirii.

 

Telefuvnnain oahppat govvet

Rino Engdal lea dovddus portreahttagovvejeaddji gii galgá oahpahit mobiltelefuvnnain govvet.

– Mobilgovven lea juoga maid nuorat háliidit oahppat, ja lea vuosttaš geardde go juste dakkár govvenbargobaji lágidit, muitala bargobaji ovddasvástideaddji.

 

Čoavjedánsun

Ingunn Lyngstad lea dánsejeaddji gii orru Álttás, ja son lea guhká bargan čoavjedánsumiin.

– Ingunn boahtá Sállanii oahpahit «Bollywood» dánsunvuogi, mii lea šaddan hui bivnnuhin dál, muitala Kristensen.


Nuorat besset oahppat ođđa bargguid ja geahččaladdat. Govven: Mads Suhr Pettersen, Sørøyrocken.

Musihkkajoavkobadji

Nuorat oahpahit eará nuoraid movt čuojahit musihkkajoavkkus. Nuoraid Kultuvra Deaivvada (NKD) oasseváldit, «Jack of Heart» joavku, galget oahpahit eará nuoraid čuojahit musihkkajoavkkus.

– Šaddá hui miellagiddevažžan go nuorat oahpahit nuoraid, ja dasa lassin lea maid Håkon Follien veahkkin regisseremis ja jođihiheames oahpaheami. Sus lea maid ollu máhttu musihkas ja lávddis, čállá iežas lávlagiid ja čuojaha máŋgga joavkkus, muitala Kristensen.

Oahpaheaddjit leat gitáračuojaheaddji ja teakstačálli Simen Schjølberg Hámmárfeasttas eret, rumbočuojaheaddji Leif Richard Nilsen Unjárggas eret ja rumbo- ja bássačuojaheaddji Markus Margido Sørnes Álttás eret.

 

Nuorat besset maid konseartabáikái

– Dat mii lea erenoamáš lea ahte dát lea fálaldat nuoraide geat háliidit ovttastallat eará nuoraiguin, ja leat dakkár ovttasbarggut maid nuorat leat háliidan, muitala Kristensen Ávvirii.

Bargobajit leat gaskal 12- ja 18-jahkásaš nuoraide. Sii fertejit máksit ovtta supmi ja besset orrut skuvllas dan haddái. Sii besset maid boahtit konsearttaid gullat mat leat «Tørrfiskloftet» báikkis.

– Buot nuorain, geat idjadit skuvllas, ferte leat rávisolmmoš mielde. Ja sii geat leat gaskal 12- ja 15-jahkásaččat fertejit leat rávisolbmo mielde konseartabáikkis, loahpaha Kristensen.

- Advertisement -
-Almmuhus-