Badjel 300 nissona Guovdageainnus bovdejuvvojit mammografiijabussii gos čižžeiskkadeami čađahit mánnodaga rájes.
Badjel 300 nissona Guovdageainnus bovdejuvvojit mammografiijabussii gos čižžeiskkadeami čađahit mánnodaga rájes.
Čižžeborasdávda lea dat borasdávda mii leavvá eanemusat nissoniid gaskkas Norggas, ja 22 proseantta nissoniin geain lea borasdávda lea čiččeborasdávda. 2015:s ledje 3415 nissonolbmo geat ožžo čižžeborasdávdda. Mammografiijaprográmma fuomáša birrasii 1100 ođđa čižžeborasdávdabuhcciid juohke jagi, ja dávjá ovdal go šattalmas lea beare haga šaddagoahtán.
Mihttu vuolidit vára
Mammografiijagovven lea almmolaš fálaldat nissoniidda geat leat gaskal 50 ja 69 jagi boarrásat, ja fállo juohke nuppi jagi. Jus árrat gávdnet dan borasdávdda, de lea stuorát vejolašvuohta divššuin dearvvašmuvvat.
Jus lea dárbu lassi iskkademiid dahkat, de gohččot nissoniid viidáset iskkademiide Romssa buohccivissui.
Mihttu dán prográmmas lea vuolidit nissoniid jápminvára čižžeborasdávdii.
Stuora oassi boahtá iskkadeapmái
Leat birrasii 75 proseantta nissoniin geat váldet dáid iskkademiid olles riikkas. Ovddit háve ledje 76 proseantta nissoniin Guovdageainnus geat válde dán iskkadeami.
Buohkat geat leat riegádan 1947 ja 1966 gaskkas, bovdejuvvojit iskkadeapmái, ja bovdehus boahtá digitála hámis sidjiide geain lea digitála poastakássa. Earáide boahtá bovdehus boares vuogi mielde.
