«Čálestan dál» gilvui ledje lágideaddjit ožžon sisa 137 čállosa, ja dál lea jury válljen vuitiid dan golmma gilvoluohkás.
«Čálestan dál» gilvui ledje lágideaddjit ožžon sisa 137 čállosa, ja dál lea jury válljen vuitiid dan golmma gilvoluohkás.
«Čálestan dál», lea čállingilvu maid Sámi lohkanguovddáš ja Ávvir leaba ovttas lágidan dan čavčča, ja dál lea gilvvuid jury válljen vuitiid. Gilvvus ledje golbma luohká, ja oktiibuot ledje lágideaddjit ožžon 137 čállosa.
Geasuhedje eanemus
Lohkanguovddáža ossodatjođiheaddji Lisa Baal muitala jury válljii dán golbma čállosa vuoitin go dat geasuhedje eanemus.
– Mii válljiimet daid teavsttaid go dat heivejit buoremusat dan gilvvu ulbmilii, mii lea árgabeaivvi áicamat,ja dat teavsttat maiddái doaimmašii sosiála mediain. Dáin vuoitoteavsttain maid lei somás ja vuorddikeahtes loahppa, lohká Baal.
Vuoitit
Mánáidluohkás vuittii Gorravári skuvlla oahppi Mathias Karlsen Eira čállosiin «okta». Nuoraidluohkás vuittii Sara Marina Skum iežas čállosiin «liekkusvuohta» ja rávisolbmuid luohkás vuoitti Berit Anne Sara Triumf čállosiin mas ii leat bajilčála.
Čálli maid jurddašii
Vuoitti rávisolbmuid luohkás Berit Anne Sara Triumf ii loga nu ollu smiehttan go čálii vuoitočállosa.
– In mun hutkan nu ollu, ja dušše čállen juste maid mun dalle jurddašin, reašká son ja muitala son láve dávjá jurddahallat gulahallama birra ja olbmuid gulahallanvugiid birra.
Hárve dušše sámegillii
Sara Triumf muitala son láve čállit dákkár smávva teavsttažiid sosiála mediain.
– Láven dábálaččat čállit sihke dárogilli ja sámegilli, ja lea hárve go dušše čálán sámegilli. Danne heiviige searvat gilvui čállit sámegilli, go dat fáddá man birra čállen dego guoskka munnje eambbo ja lea lagabus mu, lohká son.
Son lohká lei hui somá vuoittit, go ii leat goassige vuoitán ovdal maidege.
Dá lea su vuittočálus:
Láven liikot skábmaeahkediid čohkkádit jaskatvuođas ja guldalit musihka ja geahčadit go dolla buollá ommanis. Odne čohkkádan ommangáttis okto ja jurddašalan stuorát ja unnit áššiid. Áiggiid rievdama, olbmuid gulahallanvugiid. Dola ivnnit rievddadit, dolla livžžoda dego guovssahasa ruoná gáktehealmmit, ii oro jaska obage. Oavdu láveje ge ságat ja muitalusat nu geahppasit johttit árranlávus, gos asttáhagain beasai dassalit áššu vai dolla ain buoláska. Muhto dán áigge lávuin ii leat šat árran, ii ge vel asttahat ge.
Nuoraidluohká vuoiti Sara Marina Skum, 17 jagi:
Liekkusvuohta
Ulloliidni addá liekkusvuođa dutnje go galbmot. Ulloliidni lea liekkas ja addá buori dovddu dutnje. It dárbbaš galbmot go ulloliidni lea čeabehis. Sáhtát maiddai ulloliinni bidjat čeabehii vaikko ii leat galmmas. Sáhttá leat čikŋan ja addit liekkusvuođa. Sáhttá čájehit iežat identitehta ulloliinniin.
Mánáidluohká vuoiti Mathias Eira Karlsen, 12 jagi:
Okta teaksta
Dá lea okta teaksta, don logát dán teavstta, dán teavsttas ii leat mihkkege. Mun čálán dán teavstta, manne mun čálán dán teavstta? Manne don logát dán teavstta? Manne lea teaksta dáppe?
Vuoittit ožžot guhtege neahttabreahta, ja 2. ja 3. sadji ožžot girjepáhkaid.
Mánáidluohkás: Jon Axel Andreas Siri Stångberg, 6 jagi ja Ravdna Garen Buljo, 11 jagi.
Nuoraidluohkás: Jon Idar Vuolab, 17 jagi ja Kátjá Márjá Berg Grønnli, 17 jagi.
Rávisolbmuid luohkás: Eva Bromée ja Siv Eli Vuolab.
Ođđa olahus
Lisa Baal lea duhtavaš responssain gilvui, ja muitala sis lea ođđa olahus oasseváldiin dákkár čállingilvvuin.
– Mánáidluohkás oaččuimet 69 čállosa, nuoraidluohkás 20 ja rávisolbmuidluohkás ges 48 čállosa, muitala Baal.
Son livčče goitge sávvan eanet nuoraid ja dievdoolbmuid searvan gilvvuide.
– Dieđan mánáidluohkás leat skuvllain oahpaheaddjit váldán ovddasvástádusa searvat gilvvuide, ja joatkkaskuvllain eai soaitte lihka viššalat leamaš dan dahkat. Leat maid unnán dievdoolbmot geat ledje searvan gilvvuide, ja dieđan sis leat maid árgabeaivvi jurdagat go lean oaidnán Facebookas čállime, lohká Baal.
Áigeguovdilis áššit
Baal muitala gilvvus lei ollu čállosiin fáddá áibbašeapmi, muhto leat maiddái áigeguovdilis áššit.
– Čállosat leat sihke miellagiddevaččat ja somát ja lea leamaš somá lohkat daid. Olbmot orrot berošteame das mii máilmmis dáhpahuvva ja muđui servodagas, go mii leat ožžon teavsttaid mas čállit leat reflekteren earret eará Parisa terrordaguid, dálkkádaga, suohkanstivrra ja eatnama suodjaleami birra, lohká son.
