Disdaga ledje Sámi joatkkaskuvllas ja boazodoalloskuvllas Finnmárkkumeašttir fidnofágagilvvut boazodoallofágas.
Gilvvuide oasálaste buot Sámi joatkkaskuvlla ja boazodoalloskuvlla boazodoallofága oahppit, geat leat oktiibuot 13:s. Guovttis dan 13 oahppis beassaba vuolgit Girkonjargii ovddastit Finnmárkku ArcticSkills gilvvuin. Son gii bođii goalmmádin beassá vuolgit Girkonjárgii gilvalit jus nubbi dan guoktásis geat bođiiga vuosttažin ja nubbin eaba šatta vuolgit.
Aina Christine Anti Nystad vuittii 36 čuoggáin, Maren Buljo bođii nubbin 35 čuoggáin ja Elle Magdalena Skum goalmmádin 34 čuoggáin. Oahppit sáhtte čoaggit oktiibuot 40 čuoggá golmma iešguđetlágan gilvvus.
Boazodoallofága Finnmárkkumeašttir fidnofágagilvvuin eai oasálastte eará skuvllaid oahppit, go Norggas ii leat eará skuvllain dat fága.
– Dá lea dat áidna boazodoalloskuvla olles Norggas, eará nuorat galget gilvvohallat Finnmárkkumeašttir fidnofágagilvvuin Álttás, muhto mii eat dárbbaš dohko vuolgit, go mis eai leat eará gilvaleaddjit, nu ahte oahppit šaddet ieža gaskaneaset luohkás gilvalit, muitala boazodoallofága oahpaheaddji Samuel Persen Gaup, dahje Sámmol.
Golbma iešguđetlágan gilvvu
Sii álge njorostallamiin olgun, ja de juohkásedje guovtti jovkui go álge gaccastemiin ja dáktenamahusaiguin gilvalit. Bealli luohkás manne njuoskalatnjii gaccastit ja nubbe bealli fas klássalatnjii deavdit dáktenamahusaid árkkaide maid ožžo. Go goappaš joavkkut gerge, de lonuhedje.
Aina ja Maren muitaleaba ahte orui manname bures daid iešguđetlágan gilvvuin. Dan gal maid oaidná go geahččá bohtosiid, soai oaččuiga goappašagat nu eatnat čuoggáid go vejolaš sihke gaccasteamis ja dáktenamahusain, ja njorostallamis maid darveheigga eanemusat.
– Mun in lean jáhkkán ahte darvehan nie ollu njorostallamis, dadjá Aina.
– Mun ledjen oalle ládje hirpmahuvvan go nagodin gaccasteami nie bures, dadjá Maren.
Čielga favorihtta gilvu
Lei oalle čielggas mii vuitiid mielas lei suohttaseamos go Ávvir jearrá mii sudno favorihttagilvu lei.
– Njoarosteapmi! dadjaba Aina ja Maren áibbas oktanaga.
Soai muitaleaba ahte dat lei sudno favorihttagilvu dan dihte go dat lei buot álkimus, ja maiddái buot suohttaseamos. Go ledje gilvaleame, de bohte maid eará oahppit geahččat, ja dovdui ahte dat dagahii ahte šadde liigenearvvat gilvaleaddjiide.
– De gal nearvvat dovdogohte, dadjá Aina.
– Ii de deaivan šat, joatká Maren.
Liikká soai darveheigga máŋgii ja nagodeigga čoaggit ollu čuoggáid goabbáge. Aina oaččui 6 čuogga, ja dat ledjege eanemus čuoggát maid oktage oaččui dán gilvvus, Maren fas oaččui 5 čuoggá.
Alla vuordámušat ArcticSkills gilvvuide
Girkonjárggas leat eambbo gilvvut go dat mat sis leat leamaš skuvllas. Lassin gaccasteapmái, njorostallamii ja dáktenamahusaide, de leat vel moadde eará gilvvu.
– Doppe lea sihke erttegiiguin bargat, váldit visot bierggu eret. De váhkkádehkiiguin bargat, ii galgga čuovvut gumpenjuolla mielde. Doppe lea olles gottura njuovvat, nu ahte manná olles beaivi dasa. Oahppit galget suopmelaččaid ja ruoŧŧelaččaid vuostá gilvalit, ja gii de vuoitá, dat šaddá ArcticSkills meašttirin, muitala Sámmol.
Sámmol muitala ahte sus lea buorre jáhkku iežas ohppiide ja doaivu sudno birget bures ArcticSkills gilvvuin Girkonjárggas.
– Mun gal sávan ahte vuoitiba, ja go mun láven sávvat, de juoga dat gal láve dáhpáhuvvat, reašká son.
Doaivuba bures birget
Sámmol lea muitalan ohppiide ahte sin skuvllas leat vuoitán eanas ArcticSkills gilvvuid. Son dadjá ahte suopmelaččat leat várra oktii vuoitán. Go Ávvir jearrá oahppiguoktás movt doaivuba mannat gilvvuin go leaba gullan ahte sin skuvllas leat eanemusat vuoitán, de dadjaba doaivut birget bures.
– Na oalle bures de gal, dadjala Aina.
Aina ja Maren muitaleaba ahte šaddá somá vuolgit Girkonjárgii gilvalit. Muhto ovdal go vuolgiba, de ferteba hárjehallat.
– Mii beassat várra eambbo hárjehallat dáppe skuvllas, muitala Aina.
ArcticSkills gilvvut Girkonjárggas leat njukčamánus.
– Dat leat njukčamánus, in mun gal muitte nu juste gal dáhtona, dalle mii vuolgit Girkonjárgii, loahpaha Sámmol.
