Dán vahku Sámediggi ságaškuššá ođasmahtton giellapolitihka. Mii háliidit nannet ja bovdet buohkaid sámegielat searvevuhtii, ja hábmet ođđa geainnu boahttevaš jagiide.
Mii oažžut leat duhtavaččat go fas geahčadit min dálá giellastrategiija, ja oažžut dadjat ahte mii leat olahan dehálaš olahusaid: Giellagáldu – rájiidrasttideaddji normerenorgána sámegielaide lea ásahuvvon, mis lea ođđa suohkankategoriijaortnet hálddašanguovllus, mii leat álggahan Giellavahku sámegielaid ávvudeami ja oainnusmahttima dihte, ja mii leat čielggadeame sámi giellaáittardeaddji.
Mii leat dan viđa jagis, dan rájes go dievasčoahkkin mearridii dálá strategiija, olahan muhtun mihttomeriid, ja ollu lea dieđusge maid rievdan daid jagiid. Duohtavuođa- ja soabadankommišuvnna raporta lea muittuhus dáruiduhttináiggi čiekŋalis háviid birra ja das man mávssolaš gievrras giellapolitihkka lea. Maiddái eará servodatproseassat deattuhit ahte lea dárbu ođasmahttit min giellastrategiija. Dán vahku Sámedikki dievasčoahkkin digaštallá mii boahtte lávki galgá leat.
Sámegielat leat dehálaččat ovttaskas giellageavaheddjiide, sámi álbmogii ja sámi servodaga ovdáneapmái. Duohtavuođa- ja soabadankommišuvnna raporta čájehii olles Norgii daid čiekŋalis ja bávččas luottaid maid guhkes dáruiduhttinproseassa lea guođđán. Danne lea hui dehálaš ahte Sámediggi dál ráhkada buriid strategiijaid barggadettiin kommišuvnna raporttain.
Okta dain stuora gažaldagain ođđa strategiijas lea ahte movt mii galgat oažžut buori giellabarggu guovlluin mat duođas dárbbašit dan. Sámediggi lea julggaštan nuortalaš-, ubmi- ja bihtánsámegiela almmolaš ja dásseárvosaš sámegiellan. Guovddáš gažaldat dál lea makkár mihtut mis galget leat dáidda gielaide, ja movt galgat ealáskahttit sámegielaid guovlluin gos gielat eai leat šat anus.
Sámegielat eai leat dušše gulahallama dihte, dain lea maid lagas čanastupmi identitehtii, kulturárbái ja gullevašvuhtii. Sámegiella lea symbola min oktasašvuhtii, kulturárbái ja čanastagas máttuideamet. Giela massin lea leamaš ja lea ain bávččas oallugiidda min servodagas. Sámedikki mihttomearri lea ahte buohkat geat háliidit váldit máttuideaset giela ruovttoluotta, galget beassat dan dahkat. Dasa dárbbašuvvo nanu giellalokten. Muhto de fertejit maiddái ráđđehus ja Stuoradiggi čuovvulit. Norgga politihkkárat šaddet dan álo atnit muittus, muđui eai šatta sámegielas goasse seammaárvosaš eavttut go dárogielas, ja de eat olat soabadeami.
Sámegielat eai leat dušše gulahallama dihte, dain lea maid lagas čanastupmi identitehtii, kulturárbái ja gullevašvuhtii.
Mikkel Eskil Mikkelsen, sámediggeráđđi (NSR)
Sámedikki mihttomearri lea ahte buot sámegielain leat buorit ovdánanvejolašvuođat. Mii diehtit ahte sámegielaid stáhtusat ja vejolašvuođat leat iešguđetláganat iešguđet guovlluin ja iešguđet dilálašvuođaid dihte, ja ahte min politihkka ferte heivehuvvot daid mielde. Danne áigu sámediggeráđđi bargat dan ala ahte nannet ásahusaid vejolašvuođaid nanu giellabargguide. Dat guoská earenoamážit dan 20 giellaguovddážii miehtá riikka mat leat dego sámegielaid ovdáneami čuovgadoartnat.
Sámegiela girjáivuohta lea min givrodat. Sámedikki bargu lea hábmet giellapolitihka mii fátmmasta buot guovlluid ja addá buriid ovdánanvejolašvuođaid gielaide juohke áidna báikegottis. Dainna lágiin mii sihkkarastit iežamet kulturárbbi ja hábmet giellaboahtteáiggi bajásšaddi buolvvaide.
