Lávvordaga doddjojedje fas bohccot Náránaš-šalddi bokte, dán háve ii vaháguvvan gal boazoeaiggát.
Lávvordaga geavai fas nu ahte bohccot manne čađa jieŋa go galge eanu rasttildit.
Dán háve ii vaháguvvan gal boazoeaiggát, muhto ii ožžon šat bohccuid vuodjat, ja illá oažžu ealu rastá.
Ruvgaledje ieža
Joahkonjárgga boazodoalli, Josef Henrik Buljo, dat lei gii bártahuvai. Son galggai ealu bidjat rastá Heammonjavi bokte, Guovdageainnus guokte miilla vulos eanu, muhto go eallu bođii jieŋa ala, de ii gierdan šat jiekŋa ja bohccot doddjojedje.
– Dat besse gal lihkus bajás čázis fas, muhto gal nu duottostuvve ahte eai mannan šat jieŋa ala. Loahpas dan dihte ieža ruvgaledje rastá bajábeale Náránaš-šalddi, muitala son Ávvirii.
Diibmá dušše
Diibmá, sullii dán muttos áigge, dušše ge seamma báikái 17 bohcco, go Bearttašjoga siida galggai oažžut ealu rastá.
Dalle gáibidii boazodoalli Johan S. Buljo ahte suohkan galgá buhtadit sin 17 heakka, go dat šaldi, man suohkan lea huksehan vai guovtti ruvkefitnodahkii galget buoret eavttut doaimmahit barggu báikkis, lea juste johtingeainnu ala huksejuvvon.
Dál geavai gosii vahát seamma báikkis fas.
