Eallilan olmmoš várre ahte boazodoalus eai duvdigoađe eret vuorraset olbmuid ja nuoraid.
Eallilan olmmoš várre ahte boazodoalus eai duvdigoađe eret vuorraset olbmuid ja nuoraid.
Mikkel Persen Kemi (74) lea heaitán bohccuiguin olles áigge bargat nuppelot jagi áigi.
Dál son várre ahte eai galgga fal boazodoalus dan boasttuvuođa dahkat ahte duvdet eallilanolbmuid, ja maid nuoraid eret iežaset boazodoalloguovlluin.
Máhttu láhppo
Kemi čilge manin son oaivvilda dan:
– Jus vuorasolbmuid duvdet eret, dalle láhppo dat máhttu boazodoalus. Dat máhttu mii galgá oahpahit manin gosge ealuin leat, nu ahte geavahat eatnamiid riekta, čilge son.
Buolvvas bulvii
Son lohká ahte leat orohagain olbmot leamaš buolvvas bulvii, ja buolvvas bulvi maid oahppan eanangeaveheami siiddas.
Son lohká ahte dat ii galgga duššin dahkkot sin máhttu, go dat lea mii doalaha siidda čoahkis.
– Vearrát vel jus siidda vuorasolbmuid ja nuoraid duvdet eret, vai čáhkket saji olggobeale olbmuide, geat de bohtet bearrašiiguin ja oamástit daid nuoraid saji geat leat juo orohagas ja gullet dohko lohká son.
– Mun vuohtán dien guvllui dál mannáme boazodoalus, ja mun várren de ahte eai galggaše diktit dien luotta mannát, lohká son loahpas.
