Sámediggeráđđi lea juolludan 300.000 ruvnno Norgga biibbalsearvái joatkit biibbala jorgalanbarggu julevsámegillii.
Sámediggi čállá preassadieđáhusas ahte ulbmil lea ollistit Girkojagi biibbalteavsttaid jorgaleami ja joatkit Boares testameantta jorgalemiin julevsámegillii. Sámediggeráđđi Mikkel Eskil Mikkelsen (NSR) dadjá ahte lea deaŧalaš doarjut julevsámi prošeavttaid.
– Dárbu lea jorgalit biibbalteavsttaid julevsámegillii. Biibbalteavsttat sámegillii leat mielde nannemin girku almmolaš julevsámi giellaarenan. Dát sáhttá maiddai buktit oidnosii julevsámi giela ja kultuvrra ja nannet daid stáhtusa servodagas, muitala Mikkelsen preassadieđáhusas.
Giella ovdána
Sámediggi čállá ahte jorgalanbarggu bokte ovdána julevsámegiella sihke fágalaččat ja gielalaččat. Go oahpahuvvojit nuorat julevsámi jorgaleaddjit fágalaš bagaduvvon geavahusa bokte, ja barggu bokte julevsámi normeremiin ja sátnevalljodagain, ja go julevsámi giellaáššedovdit sihkkarastet kvalitehta.
Preassadieđáhusas joatká muitaleames ahte juolludus sámediggeráđis dávista Muohtačalmmit-julggaštusa vuoruhemiide, mii lea sámediggeráđi álginjulggaštus, mas deattuhuvvo earret eará man deaŧalaš lea sihkkarastit ahte sámegielat gullojit ja geavahuvvojit,
