Sii geat leat boahkuhuvvon eai soaitte dárbbašit leat erremis. Nu dieđiha Álbmotdearvvašvuođainstituhtta.
USA lea dán vahkus mearridan ahte sii geat ollislaččat leat boahkohuvvon eai dárbbaš šat erremii, vaikko leatge leamaš oktavuođas olbmuin gii lea buohcame koronadávddain. Dát gusto sidjiide geain eai leat dávdamearkkat.
Dál árvvoštallá Norga dan seamma ja soaitá čuovvulit USA, dieđiha Álbmotdearvvašvuođainstituhtta.
– Dát lea juoga maid maiddái mii Norggas árvvoštallat, lohká Álbmotdearvvašvuođainstituhta ossodatdirektevra Line Vold Dagbladet aviisii.
Vold čilge ahte leat vuos geahčadeame ja iskame movt dát doaibmá ovdalgo mearridit maidege.
– Jus lea nu ahte sus gii lea boahkohuvvon ii sáhte mange láhkai njoammut korona nuppi olbmui, de lea vejolaš ahte boahkuhuvvon olbmot eai dárbbaš erremii, lohká Vold.
Dássážii lea 222 duháha olbmo ožžon vuosttaš boahkkuma. 66 000 olbmo leat nuppi boahkkuma ožžon. Maŋimuš jándora lea 425 olbmui bastán korona Norggas. Dát lea 161 eanet go ikte, ja stuorámus lohku golmma maŋimuš vahkus.
(NTB)
