Guovdageainnu suohkan leat mearridan dál goas dán jagáš lodden šaddá.
Ikte lei Guovdageainnu suohkana meahcástanlávdegottis čoahkkin, gos mearriduvvui makkár áigodagas lodden galgá leat dán jagi.
Logi beaivvi
Guovdageainnu suohkana meahccehálddašeaddji, Anders A. Triumf, duođasta ahte bivdu galgá čađahuvvot dán áigodagas:
Disdagas miessemánu 30. beaivvi diibmu 00.00, gitta lávvordahkii geassemánu 3. beaivvi 24.00.
Miessemánu 3. ja 4. beaivvi leat hellodagat, dalle ii leat lohpi loddet.
Bivdu loahpahuvvo vel geassemánu 6. beaivvi diibmu 00.00 gitta geassemánu 10. beaivái diibmu 24.00.
– Oktiibuot logi beaivvi lea bivdu, muitala son.
Hellodagaid basuhit
Guovdageainnu suohkana meahcástanlávdegotti áirras, Vegard Olsen, muitala ahte lea sámi árbevierru basuhit go lea nu stuora bassi go hellodagat leat.
– Mii mearrideimmet ahte dalle galgá basuhuvvot, nu go leage sámi árbevierru, ja bivdu joatká de fas maŋŋel nuppi hellodatbeaivvi, muitala Olsen.
Triumf ii loga vuorbádit bivdokoarttaid ovdal go mánnodaga, dan seamma beaivvi go bivdit galget oažžut bivdokoarttaid
Birrasii 100 olbmo leat ohcan beassat báhčit oktiibuot 150 lotti. Lottit maid beassá báhčit leat fiehta, stuoravuojaš ja goalsi.
