Sámediggeráđđi vuosttalda garrasit dan konflivtta mii dál lea Gazas.
Ii mihkkege daga Israela govttohis daguid Gaza siviilaálbmoga vuostá vuoiggalažžan. Dan olbmuin geat leat gottáhallan, leat badjel 10 000 olbmo nissonolbmot ja mánát. Go nu ollugat dain geat leat gottáhallan leat olbmot geat ledje galgat ovddemus suodjaluvvot – mánát – de dat manná olmmošlašvuođa guovddáš árvvu vuostá.
Humanitára roassu Gazas, mas siviilaálbmot gillá go čáhci, borramuš ja dálkasat váilot, gáibida ahte riikkaidgaskasaččat dahkkojuvvo juoga dakkaviđe. Humanitára veahki buot siviila gillájeddjiide ferte intensiveret, ja riikkaidgaskasaš veahkkeorganisašuvnnat fertejit beassat addit heahteveahki.
Israela soahteveaga olmmošmeahttun dagut Gazas fertejit loahpahuvvot. Dagut čielgasit rihkkot riikkaidgaskasaš humanitára rievtti. Nubbi nuppi árvvusatnin, geatnegasvuohta ja olmmošvuoigatvuođaid sihkkarastin fertejit leat juohke stáhta vuođđun.
Sámediggeráđi vuosttalda Hamasa terrordaguid Israela siviilaálbmoga vuostá golggotmánu 7. beaivvi.
Dat leat dohkketmeahttun dagut, ja mii bivdit ahte siviilaolbmot geat leat váldojuvvon fáŋgan, luitojuvvojit dakkaviđe ja eavttuid haga sihke Hamasis ja Israelas. Buot bealit fertejit doahttalit olmmošárvvu maid ii galgga rihkkut, ja earuhit siviilaolbmuid ja sin geat sohtet.
Sámediggeráđi gáibida ahte ON vuđolaččat dutká buot váidagiid soahterihkkosiid ja riikkaidgaskasaš lágaid rihkkuma birra. Dakkár daguid ovddasvástideaddjit dat galget guoddit ovddasvástádusa dain.
Guovllu álgoálbmoga, beduiinnalaččaid, vuoigatvuođaid maid ferte gozihit. Go konflikta čovdojuvvo, de ferte vuhtiiváldit beduiinnalaččaid vuoigatvuođaid ja guovlluid.
Sámediggeráđđi ávžžuha sihkkarastit bistevaš (dhj. loahpalaš) čovdosa dán guhká bistán konfliktii, álbmotrievtti njuolggadusaid riikkaidgaskasaš norpmaid ja árvvu vuođul. Lágat mat galggašedje suodjalit siviilaolbmuid go kanovnnat bávket, doibmet heaggagáddjun sihkkarastin dihte olmmošlašvuođa muhtun muddui, maiddái soađis.
Juohke áidna rakeahtta, juohke áidna báhčin mas eai earuhuvvo soalddáhat ja mánát, lea garra muittuhus dasa ahte mis buohkain lea geatnegasvuohta gáibidit ahte rihkkumeahttun olmmošárvu adnojuvvo árvvus.
