Bisma Olav Øygard boahtá bismavisitásii Guovdageidnui deaivat olbmuid girkuin, ásahusain ja skuvllain.
Davvi-Hålogalándda bisma, Olav Øygard, boahtá bismavisitásii Guovdageidnui ođđajagimánu 21.-23 beivviid. Bisma galgá unnimusat juohke gavccát jagi fitnan juohke báhpasuohkanis bismagottis. Øygard háliida oaidnit movt searvegottis manná, hupmat bargiiguin, ja muđui deaivat olbmuid.
Searvegodderáđi jođiheaddji Ellen Aina Eira muitala ahte sii illudit go bisma Øygard fitná sin guossis.
– Mii illudit ja sávvat šaddá dat fiinna vásáhussan Øygardii. Mis lea máŋggabealálaš prográmma gos son beassá deaivat olu olbmuid.
Bisma galgá deaivat jođiheddjiid suohkanis gos ságastallet ovttasbarggu birra suohkana ja searvegotti gaskkas. Muđui fitná bisma iešguđet sajin, earret eará bargoguovddážis, buhcciidruovttus, Dorvogoađis ja skuvllain.
– Prográmma álgá nuoraidskuvllas gos son beassá deaivat nuoraid ja gullat makkár jurdagat ja hástalusat sis leat. Mii loahpahit beaivvi sálbmaeahkediin ja sávvat buohkaide bures boahtima, dadjá Eira.
Máze
Dain golmma beivviin go bisma lea Guovdageainnu suohkanis, de son fitná Máze girkus gos doallá ipmilbálvalusa. Doppe guossohit girkogáfe ja sagastallet movt sámi vuoiŋŋalašvuohta lei ovdal ja dál.
– Mii sávašeimmet olles Máze álbmoga boahtit ipmilbálvalussii ja ságastallamii. Bures boahtin, dadjá Eira.
Visitásalogaldallan
Guovvamánu 2. beaivvi loahpaha bismma visitasaipmilbálvalusiin Guovdageainnu girkus gos mánáidkoara oassálastá lávlumin. Mannjel ipmilbálvalusa guossohit girkogáfe Diehtosiiddas. Bisma doallá visitásalogaldallama gos čoahkkáigeassá muittuid ja oaiviliid maid son lea ožžon searvegottis dan áiggis go lei visitásas. Logaldallamis muitala Øygard jurdagiid movt boahtteáiggis sáhttá leat.
