Norgga Sámiid Riikkasearvvi jođiheaddji Beaska Niillas lea fuolastuvvan, ja cealká ahte NSR áigu bargat buot mii leš vejolaš bissehan dihtii dán luondduveahkaváldima ja dálá ealáhusaid ja riekteguddiid duolbmuma.
Norgga Sámiid Riikkasearvvi jođiheaddji Beaska Niillas lea fuolastuvvan, ja cealká ahte NSR áigu bargat buot mii leš vejolaš bissehan dihtii dán luondduveahkaváldima ja dálá ealáhusaid ja riekteguddiid duolbmuma.
Maŋŋebárgga bekkii ahte Birasdirektoráhtta dohkkeha Nussir ASA ohcama beassat ruvkebázahusaid luoitit Riehpovutnii. Norgga Sámiid Riikkasearvvi jođiheaddji Beaska Niillas fuolastuvvá ođđasii.
– Mii oaidnit ahte eat leat áidna joavku main dákkár leat áigumušat, ja lea ge dákkár áššiin main dárbbašit govda searvama, oktavuođaid ja nanu njunnoša. Vaikko vel ođas ii lean áibbas vuordemeahttun, de leamaš aŋkke smávva doaivva ahte eiseválddit galge jierpmálaš árvvoštallama dahkat, dadjá NSR jođiheaddji.
Dohkketmeahttun
– Lea áibbas dohkketmeahttun ahte sámi beroštumit ja luondu álo gártet máksit divrasepmosit go stuorraservodat ja ealáhusberoštumit galget dárbbuideaset gokčat. Vaikko leat ge eará ásahusat, nu go Mearradutkaninstituhtta ja Sámediggi, garrasit moaitán Nussira ákkastallamiid, de eai daga diehttin ge. Sáhttá jearrat lea go šat obanassiige dárbu Birasdirektoráhttii go jo sii aŋkke orrot čuovvumin ráđđehusa ealáhusáigumušaid, beroškeahttá birasváikkuhusain, joatká Beaska.
Beaska Niillas lei meara alde suohppumin liinna go gulai ođđasa. Son lea ieš guolásteaddji ja ballá ge makkár váikkuhusaid ruvkeásaheapmi sáhttá buktit su ealáhussii.
– Dákkár birasuhkideaddji industriijaásaheapmi gal sáhttá agálaš vahágiid dahkat, ja ribahit goaridit ja jávkadit bissovaš ealáhusaid, nu go boazodoalu ja guolásteami. Jus biebmagohtet guliid mirkkuin, de mii gal gal jođánit massit iežamet luohttámuša ja buori beaggima máilmmis. Dál han mii buvttadit guokte máilmmi buhtáseamos ja dearvvašlaččamus borramuša, sihke guolásteaddjit ja badjeolbmot, váruha NSR-jođiheaddji.
– Eai go leat vel oahppan? Geahča mat mo Mátta-Várjjagis dál manai, ruhtavátnivuohta dagahii ahte eai jurddašan go beaivvis beaivái, rogge buot mii lei rogganveara ja jávistedje eará málbmaguovlluid, ja nu oanidedje máŋga jagi doaimma. Dán dahke go ruhta dat lea mii stivre, ii fal guhkesáiggi jurddašeapmi ja servvodatberoštupmi. Dál lea doppe fas bargguhisvuohta, báhcán lea máŋgga millijárddalaš rehket ja našunála luossavuotna lea devdojuvvon ruvkebázahusaiguin, beaškala Beaska Niillas.
Guoddala mearrádusa
Sámediggeráđi lahttu Silje Karine Muotka lea jo dieđihan ahte Sámediggi guoddala mearrádusa Dálkkádat- ja birasdepartementii. Dalle ášši manná ráđđehussii váiddameannudeapmái.
– Dát mearrádus eahpitkeahttá rihkku álgoálbmotrivttiid. Dáid rivttiid lea Norga riikkaidgaskasaččat iežas geatnegahttán čuovvut. In ge mun ádde mo Birasdirektoráhtta lea nagodan dáid hilgut. Dat hilgot olmmošvuoigatvuođaid. Riekteguoddit galget beassat friija, ovddalgihtii miehtama addit ovdal go makkárge doaibma sáhttá álggahuvvot. Norga ferte dál čuovvugoahtit ON álgoálbmotjulggaštusa. NSR vuoruha bissovaš, birasgáhttejeaddji ealáhusaid ja vuhtii váldá luonddu ja luonddu geavaheddjiid. Dás mii orrut leamen ruossulassii eiseválddiiguin, loahpaha Beaska Niillas.
