Báikkis leat heahtebálvalusat ja čađahit ohcanakšuvnna.
Finnmárkku politiijat dieđihit Twitteris geassemánu 4. beaivvi diibmu 11:20 ahte okta biila lea geavvan johkii Ánnejoga šalddi buohta, Čáhcesullo gielddas.
Finnmárkku politiijaid operašuvdnaguovddáš muitala ahte lea eahpečielggas galle olbmo leat biillas, muhto báikkis leat njeallje buokčaleaddji ja buot heahtebálvalusat.
– Biila lea geavvan johkii šalddi buohta iige leat guhkkin das eret gos johka golgá Várjjatvutnii. Mii jáhkkit biillas lea okta olmmoš, muitala operašuvdna guovddáš.
Ságat čállá ahte báikkis čađahit ohcanakšuvnna sullii 300 mehtera eret das gos biila geavai johkii. Báikkálaš fanaseaiggádat ohcet veahkkin.
– Doppe leat olu veagat báikkis. Jogas lea dulvi ja doaivumis nagodat gávdnat biilla fargga, dadjet operašuvdnaguovddážis.
Diibmu 13 čállá Ságat ahte biila lea gávdnon.
Vihtanat leat muitalan Ságat aviisii ahte oidne ovtta olbmo biillas.
Politiijat leat gidden báikki gos biila lea gávdnon. Politiijat báikkis eai muital galle olbmo leat biillas.
