Fránska turisttat njalkkihedje badjel luotta biillain. Johtolat lea bissehuvvon báikkis.
Guovdageainnu márkanguovddáža davvelis lea biila vuodján badjel luotta. Báikkis leat politiijat bissehan johtolaga dan botta go leat gaikume biilla bajás.
Biillas leigga dievdoolmmoš ja nuorra nissonolmmoš.
Politiija báikkis, Anders Norlie, muitala ahte goappašagat beasaiga biillas ieža olggos ja sudnuin manná bures.
– Ambulánsa lea leamaš iskame goappašagaid ja soai leaba ožžon fálaldaga hupmat dearvvašvuođabargiin, lohká Norlie.
Norlie lohká njalka siivvu miehtá Finnmárkku odne.
– Dán biillas ledje buorit dálvejuvllat, muhto odne lea hui njalka siivu. Leat máŋga badjelluottavuodjimat leamaš Finnmárkkus odne, ja leat earenoamážit turisttat geat leat bártašuvvan dainna, dadjá Norlie.
Johtolat bissehuvvo báikkis dassážii go leat ožžon biilla bajás.
