Biebmobearráigeahčču dieđiha ahte ožžot olu cavgilemiid olbmuin elliid birra mat gillájit. Olbmot dieđihit ahte ballet elliin ii leat buorre dilli.
Biebmobearráigeahčču dieđiha ahte ožžot olu cavgilemiid olbmuin elliid birra mat gillájit. Olbmot dieđihit ahte ballet elliin ii leat buorre dilli.
Diibmá ožžo biebmobearráigeahču davvi ossodagas 1071 cavgileami. Diibmá ledje 20 proseanta eambbo cavgileamit go ovddit jagi. Dan dieđihit preassadieđáhusas.
– Lea hui dehálaš ahte olbmot dieđihit Biebmobearráigehččui jus ballet elliin ii leat buorre dilli, lohká šibitdoavttir Hege Osen. Son lea maid okta ossodathoavddain Biebmobearráigeahču Davvi ossodagas.
– Buohkain lea geatnegasvuohta cavgilit jus ballet eallit gillájit.
Čađahit bearráigeahču
Biebmobearráigeahčču čađaha bearráigeahču sihke guollebiebmanrusttegiin, valáštallanelliin, buvttadanelliin ja biebmoelliin. Cavgileamit lassánit juohke jagi.
Diibmá lei njealjádasoassi cavgilemiin biebmoelliid birra.
Jus elliidčálgoláhka rihkkojuvvo roavvásit, de váidojuvvo ášši politiijaide. Biebmobearráigeahčču veardida juohke cavgileami maid ožžot.
– Mii fertet álo veardidit galgat go vuolgit bearráigeahččat, vai galgat go gulahallat eaiggádiin eará láhkái, lohká Osen.
– Eaiggádat geat roavvát leat goaridan dahje illástan elliid ožžot sáhku ja váidojuvvojit politiijaide. Muhtumat gildojuvvojit elliid doallamis.
Eaiggáda ovddasvástádus
Lea álo eaiggáda ovddasvástádus gozihit ahte elliin lea buorre dilli.
– Lea stuora ovddasvástádus eaiggádit ealli, lohká Osen.
Oktiibuot olles diimmážis bohte 9386 cavgileami elliid birra. Biebmobearráigeahču neahttasiidduin lea boallu man deaddila jus áigu cavgilit, juogo elliid dahje boradanbáikkiid birra.
