Dán lohkkiidreivves ávžžuha Kárášjot’listta sátnejođiheaddjeevttohas, sihke politihkkáriid ja jienasteddjiid jurdilit man láhkai hállat politihkkáriid birra ja sin geat listtuide servet.
Čujuhan Ávvira válgadebáhttii mas posišuvdna, Bargiidbellodat ja sátnejođiheaddji, Sámeálbmot bellodat ja várresátnejođiheaddji ja Olgeš, čuoččuhedje almmolaččat ahte mii Kárášjot’listtas eat leat buktán iežamet bušeahttaárvalusaid ja ahte leat guorrasan ja dorjon sin árvalusaid.
Dákkár giellásiid eat sáhte mii dohkkehit ja leat odne gielddastivrras ožžon gielddadirektevrra dárkkistit ja duođaštit ahte mis lea boahtán árvalus. Kárášjot’lista lea 2019–2021 buktán oktasaš árvalusa ovttas min buori ovttasbargobellodagain Guovddášbellodagain. Diibmá ovddideimmet goabbatge árvalusa masa eat ožžon ovttage čuoggái eanetlogu. Ahte posišuvdna dán lahkai gielista álbmogii lea eahperehálaš ja njulgestaga badjelgeahččanvuohta. Sii badjelgehččet min politihkkáriid geat leat olu áiggi ja návccaid bidjan ovddidit árvalusaid buorrin gildii ja álbmogii. Dasa lassin badjelgehččet álbmoga, go vigget dáinna vugiin dájuhit jienasteddjiid ahte politihkalaš molssaeaktu lea dorjon sin árvalusaid ja eat mat váldde ovddasvástádusa.
Vurden ahte bohtet átnut mis ándagassii go ná fasttit lágidit iežaset válgagičču, muhto orrot dađibahábut jávojienahaga.
Loahpas háliidan ávžžuhit sihke politihkkáriid ja jienasteddjiid jurdilit man láhkai mii hállat politihkkáriid birra ja sin geat listtuide servet. Demokratiijai lea dehálaš ahte iešguđet olbmuide ja jienaide lea sadji, ja sáhttá váddásat oažžut olbmuid searvat dán dehálaš bargui jus mii gielistat ja soaibmat nuppiid.
