«Belggiin» mátkkošteaba birra Sámi

– Andrey čuojahii mannan sotnabeaivvi ja jearai mus galge go Johkamohkis fitnat. Mánnodaga iđđes vulggiime jo, muitala Aleksandr.

Andrey Zhvaviy ja Aleksandr Slupachik orruba Lujávrris, berošteaba servodatáššiin, iežaska kultuvrras ja jođiheaba «Nutash Inn» (nuoraid jietna) prográmma.

Sudnos eai lean plánat dollet mátkái, muhto dál leaba goit juo jođus. Iežaska mátkkošteami govvideaba ja čálliba vásáhusaid unna girjjážii.

– Vulggiime mannan mánnodaga Lujávrris. Odne letne jo Guovdageainnus, muitaleaba nuorra Lujávrri gávttehasat.

– Čájehit ahte gávttiin sáhttá mátkkoštit

Go Ávvir humadii mátkkošteaddjiguoktáin de sudnos ledje gávttit badjelis.
– Lea go mii nu ulbmiliid dáinna?

–  Mis lea sámenuoraid birra prográmma ja nuorra guldaleaddjit,  danin jurddašeimme ahte galgá juoga positiiva čájehit, movttiidahttit nuoraid sámevuođa čalmmustahttit, lohká Andrey.

Aleksandr lasiha dása:

– Dávjá ipmirdit nuorat ahte gávtti coggalit dalle go leat stuorát doalut, basiid oktavuođas. Moai čájehetne fas ahte gávttiin sáhttá mátkkoštit.

– Leahppi go festiválii?

Dán gažaldaga leat olbmot geaid mielde leaba ain ožžon sáhtu jearran nuorra bártniin.  
– Dá lei Norgga bealde. Olbmot veahá imaštalle manne munnos leat gávttit badjelis. Suomas ja Ruoššas eai oba ge beroštan ge dás.

Big Sámi Trip

Lujávrri olbmát lohkaba gohčodit iežas mátki «Big Sámi Trip».

– Na go moai hálidetne fitnat buot váldo sámebáikkiin. Letne juo fitnan  Avvilis, Anáris, Kárášjogas, odne letne Guovdageainnus, dasto Johkamohkkái, muitaleaba oktiinjálmmiid.

Manin juste Johkamohkkái?

– Ean leat goassege leamašan doppe.  Muđui ge áigo oaidnit sáme gilážiid, báikkiid, finadit Sámedikkis ja nu ain.  

Ruovttoluotta áiguba johtit Roavvenjárgga bokte ja dasto Sala duollostašuvnna bokte Lujávrái .

30 kilomehtera vácciiga

Sudno áigumušaid mielde galggaiga ollet Guovdageidnui juo ikte, muhto lohkaba váttisin doallat áigemeriid maid leaba bidjan. Muhtun sajiin lei álki oažžut sáhtu, muhtun sajis fas ii.

– Ruoššas ja Norggas lei hui álki. Oaččuime johtilit sáhtu. Suomas gal šattaime ollu vázzit. Doppe eai bisánan nu ollu biillat.

Soai eaba loga vuos diehtit man galle kilomehtera oktiibuot šaddá sudno mátki Lujávrris Johkamohkkái.

– Dassážii letne lohkan galle kilomehtera letne  váccán dán mátkkis. 30 kilomehtera ja meastá buot Suomas, mojiin vástideaba Aleksandr ja Andrey.

Eaba dieđe gos idjadit

Dassážii leaba idjadan oahppásiid ja ustibiid luhtte. Seammás de boradeaba maid oahppásiid luhtte. Odne go Ávvir humadii sudnuin, de leigga boradeame bensinstašuvnnas.

– Ean leat plánen nu guhkás gal. Johkamohkki guovllus gal eai leat vuos oahppásat. Dan gal oaidná gos, goas ja gean luhtte idjada, lohkaba olbmáguovttos.

Áiguba eambbo mátkkoštit

Vaikko lohkaba muhtumin váttisin oažžut sáhtu ja vaikko lea eahpečielggas gos idjadit ain galgaba, de aŋkke sávvaba eambbo mátkkoštit.

–  Sávve ahte «Big Sámi Trip» ii noga dása. Maŋit áiggiid vulge eará sámebáikkiide.