Son ovttasbargá Thon hoteallain ja ofelastá sihke hotealla turisttaid ja alla hearráid meahcástantuvrraide ATV vuojániiguin. Otne vulggii son oagguntuvrii Thon hotealla oaivedirektevrrain.
Son ovttasbargá Thon hoteallain ja ofelastá sihke hotealla turisttaid ja alla hearráid meahcástantuvrraide ATV vuojániiguin. Otne vulggii son oagguntuvrii Thon hotealla oaivedirektevrrain.
Odd Arne Hætta fitnodat fállá meahccetuvrraid ATV vuojániiguin, ja dustege dainna turisttaid mat dán geasi orrot Thon hoteallas.
– Mis lea ovttasbargu hoteallain, ja fállat iešguđetlágan tuvrapáhkaid, sihke oanehis ja guhkebuš mátkkiide.
Beassá čájehit
Thon hotealla Guovdageainnus muitalii árat dán giđa sii devdet lanjaid gussiiguin juohke ija suoidnemánus, muhto muđui lea sis unnán fállat turisttaide. Hætta lohká dál leat lassanan geasseturisma, ja go Thonas leat alddis ATV vuojánat de lea álki vuolgit tuvrraide. Hætta ii vuoje dušše olgoriika turisttaiguin, ja otne čavgi son oagguntuvrii Norgga Thon Hotealla oaivedirektevrrain Morten Thorvaldsenain.
– Dál beasan čájehit sutnje man fiinnis luonddus mis dáppe lea ja maid sáhttit dáppe Guovdageainnus fállat, lohká Hætta.
Lunddolaš ovttasbargat
Thorvaldsen lohká sidjiide Thonas lea šaddagoahtán dábáleabbo ahte sii ovttasbarget báikkálaš fitnodagaiguin, ja nu lea sis máŋgga sajes Norggas.
– Ii okta ge guossi boađe vásihit min hotealla seaŋgga, sii baicca áigot vásihit dat mii lea birrasis ja Luonddu. Dal leat ožžon dáppe sadjái skohteriid ja ATV vuojániid, nu ahte dat geahpida ovttasbargat fitnodagaiguin, lohká son.
Dási iskkat
Thorvaldsen lea leamaš Guovdageainnus dálvet meahcis, muhto ii geasset.
– Lea buorre go dál beasan sihkkarastet dási dán tuvrras, muhto jáhkán šaddá buorre tuvra go mii orrot gávdnan buori láidesteaddji ovttasbargui.
