Kárášjohkalaččaid beroštupmi meahccesihkkelastimii lassána, danin lea Kárášjoga sihkkelsearvi mearridan lágidit kursa. Norgga beahkkán Aslak Mørstad lea oahpaheaddjin.
Kárášjohkalaččaid beroštupmi meahccesihkkelastimii lassána, danin lea Kárášjoga sihkkelsearvi mearridan lágidit kursa. Norgga beahkkán Aslak Mørstad lea oahpaheaddjin.
Meahccesihkkelasti Aslak Mørstad vuittii Norggacupa vuosttaš gearddi 1994:s, dan maŋŋel lea bures birgen sihke riikka- ja máilmmigilvvuin. Son lea maiddái kursaoahpaheaddji, ja dán vahkkoloahpa besset kárášjohkalaččat oahpahallat sihkkelastit meahcis.
– Doaivvun oasseváldit fuomášit ođđa beliid meahccesihkkelastimis ja ahte háliidit vel eambbo sihkkelastit meahcis. Mii leat vuohttán ahte kárášjohkalaččaid beroštupmi meahccesihkkelastimii šaddát stuorát ja stuorát, ja danin háliideimmet ahte profeššunealla oahpaha mo galgá sihkkelastit meahcis. Meahcis oahppá olu okto, muhto čehpiin oahppá vel eanet. Erenomáš dehálaš lea sihkkarvuođaoahppu, dán lea dehálaš máhttit jus lea okto jođus meahcis, čilge Kárášjoga sihkkelsearvvi jođiheaddji Osvald Grønmo.
Kárášjoga sihkkelsearvvi jođiheaddji Osvald Grønmo. Govven: Kárášjoga sihkkelsearvi
Easkaálgiide ja hárjánan sihkkelastiide
Kursaoahpaheaddji lea gilvalan miehtá Eurohpá, USA, Canada ja Mexico, son lea maiddái hárjehallan ja oahppan olu máilmmibeahkkán meahccesihkkelastiin. Dán oahpu besset dál kárášjohkalaččat gazzat. Kursa lea sihke easkaálgiid várás ja sidjiide geat leat veahá sihkkelastán mehciin. Olles vahkkoloahpa hárjehallet oasseváldit teknihka ja iešguđetlágan goansttaid mo meahcis sihkkelastá. Dasa lassin oahpaha Mørstad sihkkarvuođa ja sihkkeldikšuma birra.
– Sihkkelkursii servet 10 oasseváldi, muhto mis lea ain vejolašvuohta váldit eambbosiid mielde jus háliidit. Mu mielas lea buorre oasálastin go mii eat leat ovdal fállan dákkár fálaldaga, jáhkkán oasseváldit ožžot buori ávkki kursas, lohká Grønmo.
Beroštupmi lassána
Kursa lea nuoraid ja ollesolbmuid várás. Vaikke kursa ii leat smávimusaide, de besset dattege sii hárjehallat oktii vahkkui.
– Mis lea sihke mánáide ja nuoraide vahkkosaš kurssat, erenomážit lea mánáidkursii stuora beroštupmi. Mánáidsihkkelastimiidda lávejit sullii 20:s searvat. Muđui láve boarráset geardi deaivvadit ja ovttas sihkkelastit oktii vahkkui, mii gal duolmmadat eanaš geaidnoráigge, muhto jurdda lea maiddái álgit mehciid sihkkelastit oktii vahkkui. Mii lágidit maiddái jahkásaš sihkkelastima vári badjel Valjohkii borgemánus. Diibmá ledje masá 50 oasseváldi. Olbmot lávejit hui duhtavačča, erenomážit sii geat bohtet olggobealde, go sidjiide lea min meahcci hui erenomáš, čilge Grønmo.
Kárášjohkalaččain leat buorit vejolašvuođat sihkkelastit mehciin, beroštupmi lassána meahccesihkkelastimii ja danin lágidit dál kursa gos oasálastit ohppet eambbo meahccesihkkelastima birra. Govva lea govviduvvon Sávkadassihkkelastimiin 2013:s. Govven: Kárášjoga sihkkelsearvi
Eallindilli buorrána
Kárášjoga sihkkelsearvvi jođiheaddji muitala ahte Kárášjogas leat erenomáš buorit vejolašvuođat go duolmmasta sihkkeliin. Jus áigu geaidnoráigge sihkkelastit, de leat olles vihtta váldogeainnu maid sáhttá duolmmadit ja meahccesihkkelastiin leat maid buorit vejolašvuođat go gielddas leat olu njealjejuvllatsihkkelmađit.
– Sihkkelastin heive buohkaide. Go finat sihkkelastimin, de lea dus dakkár energiija ja mokta. Eallindilli buorrána ja lea hui dearvvašlaš. Mun ávžžuhan eambbosiid álgit sihkkelastit, dadjá Kárášjoga sihkkelsearvvi jođiheaddji Osvald Grønmo.
