Odne beal oktanuppelogi áigge girde guokte Norgga suodjalusa girdi Davvi-Norgga badjel ja bukte issoras garra bávkkeheami, go girde čađa jietnamuvrra.
Odne beal oktanuppelogi áigge girde guokte Norgga suodjalusa girdi Davvi-Norgga badjel ja bukte issoras garra bávkkeheami, go girde čađa jietnamuvrra.
Okta gean bávkkanasat suorggahedje lea Berit Marie Eira ja su bearraša. Son lei barttas čohkohallame iežas geasseorohagas Návuonas, Romssa fylkkas, ja muitala ahte bávkkanas gal suorggahii.
– Fáhkka bávkkehii nu issoras garrasit guovtte geardde ahte lei oalle ilgat, ja lei dan mađe ahte barta doarggistii vel. Moai isidiin viehkaleimme verándda ala geahččat mii jur dat ges lea, ja álggos jurddašeimme bávkkanas lei luoddabarggu geažil, mii lea dáppe lahkosis, muitala son.
Dego stuora bissu
Eira lohká soai de smiehtaiga lei go son dat meteorihtta mii gahčai, go soai oainnat muitáiga meteorihta mii gahčai Ráisávžái das logi jagi áigi, muhto gulaiga oalle jođánit ahte lea girdi birra sáhka.
– Mun, gii lean ealgabivdi, mu mielas lei bávkkanas nu garrasit dego livččii báhčinšiljus čuožžume bealljesuodjalusaid haga, lohká Eira.
1000 kilomehtera diimmus
Suodjalusa operatiiva váldoguovddáža gulahallanolmmoš Bådådjos, Brynjar Stordal, duođašta ahte ledje guokte F-16 girdi mat girde Davvi-Norgga badjel, ja dat dagahedje bávkkeheami go girde jietnamuvrra čađa.
– Girdit ledje albma barggus, eai lean hárjehallame. Go girdit leat duohta barggus, de lea lohpi girdit nu jođánit go sáhttet, ja dat lea birrasii 1000 kilomehtera diimmus. Dat mearkkaša dan leahtus ahte girdet čađa jietnamuvrra ja muhtumin sáhttá dagahit ahte de bávkkeha.
Ii álo beaškket
Son čilge ahte ii bávkket álo go girdet dien leahtus, ja leat atmosfearalaš dilálašvuođat ja temperatuvrrat mat galget heivet nu ahte bávkkeha.
– Maiddái áibmoassodat ja man vuollugit eatnama bajil girdi lea mearrideaddji man viidát bávkkanas gullo, lohká Stordal.
Iskamin amas girdi
Stordal muitala girdit leat oassin Nato gearggusvuođas, ja go rádáris oidnet girdijohtolaga olggobealde Norgga territoriijas, man eai nagot identifiseret, de sáddejit girdiid dohko.
– Mii leat oaidnán rádáris girdi ja dat guokte girdi leat girdán iskat dan, ja maŋŋel buktiba raportta mii dat lei.
Lohku njiedjan
Stordal čilge ahte girdit leat oalle dávjá duohta barggus, muhto dat rievddada jagis jahkái.
– Diibmá ledje mis 30 duohta girdinbarggu gos girddiimet identifiseret 51 girdi, ja dat lea njiedjan ovddit jagi ektui, lohká son.
